Namminersornerup eqqunneqarnera

Allaffigitigut Sulisut
Ikinngutinnut ingerlateqqiguk Ujaruk

Paasissutissat sukumiinerusut
Namminersornerup eqqunneqarnera pillugu Josef Motzfeldtip oqalugiaataa...
Josef Motzfeldtip Dronningimut Ministeriunermullu qujassuteqarluni oqaasii...
Namminersorneq pillugu inatsit

Ulloq 21. juni inuiattut ullorsiornermi namminersornerup eqqunneqarnera malunnartinniarneqarpoq.

Ulloq Inatsisartuni persuarsiorfiusumik nuannersumillu malunnartinniarneqarpoq Ataqqinartorsuarmit Dronningimit Kunngikkormiutullu ataqqinassusilimmit Prinsimit kiisalu Islandip Præsidentianit peqataaffigineqarluni. Namminersorneq pillugu inatsisip Inatsisartut ataatsimiittarfianni tunniunneqarnerani Danmarkimi, Islandimi Savalimmiunilu inatsisartut siulittaasui aamma peqataapput, soorlu aamma Nunavummi inatsisartut siulittaasuat peqataasoq.

Namminersorneq pillugu inatsit tunniunneqarpoq Annaassisitta Oqaluffiani nuannersumik naalagiaqatigiittoqareermat. Inatsisartut Siulittaasuata Josef Motzfeldtip Inatsisartut ataatsimiittarfianni persuarsiorfiusumik ataatsimiinneq ammarpaa namminersulernermi Kalaallit Nunaata unammillerniagassai eqqartorlugit.

Ministeriunerup Lars Løkke Rasmussenip oqalugiarnermini inuiaat kalaallit pilluaqqoreeramigit Danmarkimi Naalakkersuisut Folketingilu sinnerlugit matusartoq siilviusoq, iluani kanngussattalik ukiuni 70-ini Christiansborgip qaliarisimasaata ilaanik, tunissutigaa. Tunissuteqarnermi oqaaseqarnermini oqaatigaa kanngussaap ilisarnaataasa ilagimmassuk piffissap ingerlanerani allanngoriartortarnini inerikkiartortarninilu. Soorlu aamma Danmarkip Kalaallit Nunaatalu akornanni pissutsit taamaattut.

Tamatuma kingorna ataqqinartorsuup Dronningip Namminersorneq pillugu inatsisip allaqqaarnera Inatsisartut Siulittaasuannut tunniuppaa. Josef Motzfeldtip qujassuteqarnermini oqaatigaa persuarsiornartumik tunniussineq inuiat kalaallit oqaluttuarisaaneranni pisunut puigugassaanngitsunut ilaalerumaartoq.

Pisortatigoortumik tunniussineq malunnartinniarlugu assiliseqatigiittoqarpoq Inatsisartut tamarmiusut qinigaaqqaallu Ataqqinartorsuaq Dronningi, Prinsi Kunngissakkullu kiisalu Folketingip siulittaasut ministeriunerlu assiliseqatigalugit.