Inatsisartut
Inatsisartut Kalaallit Nunaata inatsisiliortutut ataatsimiittartorai. Inatsisartuni Kalaallit Nunaanni inatsisissat oqallisigineqarlutillu akuerineqartarput. Inatsisartut 31-nik inuit qinigaannik, nalinginnaasumik ukiunut sisamanut qinigaasartunik, ilaasortaqarput.
Inatsisartut nalinginnaasumik ataatsimiinniarlutik ukiumut minnerpaamik marloriarlutik naapittarput. Inatsisartut ukiuat septembarimi tallimanngornerit pingajuanni aallartittarpoq ukiullu tulliani tallimanngornermut tassunga ingerlasarluni. Immikkorluinnaq pissutissaqartillugu Inatsisartut immikkut ittumik ataatsimiigiaqquneqarsinnaapput.
1988-imiit Inatsisartut siulittaasoqarfeqarput Inatsisartut siulittaasuata saniatigut Inatsisartunut ilaasortanik sisamanik ilaasortalimmik. Inatsisartut Siulittaasoqarfiat Inatsisartut tassungalu ilaasortat sulinerminni naapertuuttumik atugassaqartinneqarnissaasa qularnaarneqarnissaanut suliassat assigiinngitsut isumagineqarnissaannut akisussaavoq.
Inatsisinik nutaanik taakkununngalu allannguutinik akuersissuteqartarnerup saniatigut Inatsisartut qitiusumik suliassaasa ilagaat Naalakkersuisut sulinerannik nakkutiginninnissaq, taakku siulittaasussaannik qinersinissaq kiisalu aningaasanut inatsimmik akuersissuteqartarnissaq.
Innuttaasut qinikkat aqqutigalugit naalakkersueqataaneranni Inatsisartut Naalakkersuisut eqqartuussiviillu peqatigalugit sukarsuartut najummiisuusutut inissisimapput, peqatigiillutik pissaanerup pingasoqiusamik agguataarneqarsimaneranik ersersitsisut.
