Inatsisartut Siulittaasoqarfiat Inatsisartullu allattaanerat
Inatsisartut Siulittaasoqarfiat Siulittaasumik siulittaasullu tulliinik sisamanik Inatsisartunit qinerneqartunik inuttaqarpoq. Siulittaasup, ulloq tamaat atorfeqartitaasup, Siulittaasoqarfiup suliassaasa isumagineri suliarisaraa. Inatsisartut Inatsisartunilu ilaasortat sulineranni kiisalu Inatsisartut Naalakkersuisullu akornanni suleqatigiinnermi naapertuuttunik atugassaqartitsisoqarnissaa qulakkeerniarlugu Inatsisartut Siulittaasoqarfiata suliassat assigiinngitsorpassuit isumagineqarnissaat akisussaaffigaa. Tamatuma saniatigut Inatsisartut sinnerlugit avammut kiinnernissamut aammalu Inatsisartut suliaasalu inerneri pillugit paasissutissanik pitsaasumik tamanut ingerlatitseqqinnissamut Siulittaasoqarfik pisussaaffeqarpoq. Siulittaasoqarfittaaq Inatsisartut toqqortaataasa toqqortaatigineqarnissaannut tammatsaaliorneqarnissaannullu akisussaasuuvoq.
Siulittaasoqarfiup sulinera pingaarnertigut Inatsisartut Naalakkersuisullu pillugit inatsit, Inatsisartuni ilaasortat il.il. aningaasarsiaqartitaanerat pillugu inatsit kiisalu Inatsisartut Suleriaasiat naapertorlugit ingerlanneqarpoq. Suliassamut tassunga ilanngullugu Siulittaasoqarfik suliassanik suugaluartunilluunniit Inatsisartunut Inatsisartunilu ilaasortanut tunngaviusumik pingaarutilinnik suliarinnissinnaavoq. Naallu suliassat ingerlatallu Inatsisartut ataatsimiilernerisa ataatsimiinnerisalu nalaanni annertunerusaraluartut Siulittaasoqarfiup akisussaaffiisa suliassaqarfiisalu ukioq kaajallallugu tunaartaqarluartumik sulinissaq pisariaqartippaat.
Siulittaasoqarfiup suliassaqarfii akisussaaffeqarfiilu pingaarnertigut makkuupput:
Inatsisartut sinnerlugit avammut kiinnernissaq, makku ilanngullugit:
- Naalakkersuisunut sammisumik ataqatigiissaarinermi suliassat,
- Naalagaaffeqatigiinnermi inatsisartutigoortumik sinniisoqarnermi ataqatigiissaarinermi suliassat,
- nunatsinnit nunanillu allanit aallartitat tikeraarneranni qaaqqusisuuneq,
- nunatsinnit nunanillu allanit qaaqqusisoqartillugu ilassinninnermut tunngasumik suliassat,
- sulinermik suliallit kattuffiinut kattuffinnullu allanut tunngatillugu ilassinninnermut tunngasumik suliassat.
Inatsisartut Suleriaasiat naapertorlugu suliassat, makku ilanngullugit:
- Qulequttat aalajangiiffigisassatut oqaaseqarfigisassatulluunniit nassiunneqarsimasut aammalu apeqqutit suliarineqartussatut naatsorsuutigineqartut nalunaarsorneqarlutillu nassiussuunneqarnerat.
- Qulequttat apeqqutillu nalunaarsorsimaffiata tamanut saqqummiunneqarnera.
- Inatsisartut ataatsimiinnerannik siulersuineq.
- Inatsisartut Suleriaasiat pillugu Ataatsimiititaliatut atuunneq (Suleriaaseq naapertorlugu ilaasortaatitaasussanik ilassuteqartillugu).
- Suliassanik Suleriaaseq naapertorlugu Siulittaasoqarfimmut saqqummiunneqartussanik suliarinninneq.
- Suliassanik Inatsisartunut Inatsisartunilu ilaasortanut tunngaviusumik pingaaruteqartunik suliarinninneq.
Inatsisartut ataatsimiititaliallu sulinerisa aaqqissuussivigineqarnissaannik illersorneqarsinnaasumillu ingerlanneqarnissaannik isumaginninneq, tassunga ilanngullugit:
- Inatsisartut atortorissaarutaasalu ingerlatsivigineqarnerat,
- piffissanik ataatsimiiffiusussanik ininillu ataatsimiiffiusartunik agguataarineq,
- ataatsimiititaliat oqalutseqarnikkut, nutserisoqarnikkut ataatsimiititalianullu allatseqarnikkut pitsaasumik sullinneqarnissaannik qulakkeerinninneq,
- suliassanik qulaajaavigineqartussanik immikkoortiteralunilu ingerlatsineq,
- qarasaasiatigut atortulersuutinik attaveqaatinillu nutaaliaasunik atuinermi ilisimasalimmik ikiorsiisoqarsinnaaneranik qulakkeerinninneq,
- ataatsimiititaliat angalanissaasa isummerfigisarneri,
- ataatsimiititaliat angalanissaasa pilersaarusiornissaat ingerlanneqarnissaallu pillugit isummertarneq,
- Inatsisartut ataatsimiinnissaannut atatillugu Inatsisartuni ilaasortat angalanerannut ineqartinneqartinneqarnerannullu tunngasunik isumaginninneq.
Inatsisartuni ilaasortanut siusinnerusukkullu Inatsisartuni Naalakkersuisunilu ilaasortaasimasunut tunngatillugu aningaasarsiaqartitsinermut inatsimmik allaffissornikkut aqutsineq.
Inatsisartut Naalakkersuisullu pillugit inatsit naapertorlugu immikkut ittumik suliassat makkuupput:
- Inatsisartut inatsisissaattut peqqussutissaattullu siunnersuutinik Inatsisartut suliarinninnerisa inernerinik susassaqartunut nalunaaruteqartarneq,
- Inatsisartut ataatsimiissutaannik kalaallisut qallunaatullu tamanut saqqummiussineq,
- Inatsisartut toqqortaataannik toqqortaatiginninneq tammatsaaliuinerlu.
Siulittaasoqarfik suliassanut ingerlatassanut Inatsisartut allattoqarfiannit sullinneqartarpoq. Siulittaasoqarfik sulisunik akissaateqarfiit 39-ianni qaffasinnerusuniluunniit inissisimasunik atorfinitsitsisarlunilu soraarsitsisarpoq, Inatsisartut Siulittaasuat sulisunik allanik atorfinitsitsillunilu soraarsitsisartoq. Naalakkersuinikkut inatsisartunilu suliassat eqqarsaatigalugit siulittaasoqarfik allattaanermit, Inatsisartut allattoqarfianni qulliunerusumik aqutsinermut akisussaasuusumit, sullinneqartarpoq.