Ataatsimiinnerit 

Inatsisartut minnerpaamik ukiumut marloriarlutik ileqquusumik ataatsimiittarput. Inatsisartut ukiuat septemberimi tallimanngornerit aappaanni aallartittarpoq ukiullu tullissaani taamaalinerani tallimanngorneq tikillugu atuuttarluni.

Inatsisartut siulittaasuata pisariaqartutut isigippagu Inatsisartuttaaq immikkut ittumik sukkulluunniit ataatsimiissinnaapput. Aammattaaq Inatsisartut ataatsimiittussaapput Naalakkersuisut Siulittaasuata imaluunniit minnerpaamik Inatsisartunut ilaasortat affaasa piumasarippassuk. Immikkut ittumik ataatsimiinnerni suliassat immikkut ittumik ataatsimiigiaqqusinermut tunngaviliisuusut taamaallaat Inatsisartut suliarisussaavaat.

Inatsisartut ataatsimiinnerinut atasumik Siulittaasoqarfik ullormut oqaluuserisassanut ataatsimiititaliatut atuuttussaavoq. Tassa imaappoq, Siulittaasoqarfik siunnersuutinik, apeqqutinik il. il., ataatsimiinnermik pineqartumi suliarisassanngortitanik qanoq siliarineqarnissaannik Inatsisartunit akuersissutigisassamik inassuteqaasiortussaavoq. Ataatsimiinneq aallartitsinnagu Siulittaasoqarfik siunnersuutinik, apeqquteqaatinik il. il., Inatsartunut ilaasortanut ataatsimiinnissami isumaqatigiinniutigineqartussatut naatsorsuutigisanik allattukkamik takussutissiortussaavoq.