Attaveqarfissaq

Laila Kristiansen
+299 34 61 20
lkri at inatsisartut dot gl

Suliat Inatsisartunut Naalakkersuisunullu ilaasortat Inatsisartut oqaluuserisassaannut ilanngukkusutaasa ilusilernissaannut piumasaqaatit assigiinngitsut arlallit atuupput.

Suliat Inatsisartunut saqqummiukkusutat ilusilernissaannut piumasaqaatit ataani pineqartut nittartakkami ujalerfissiami saamia tungaaniittumi takuneqarsinnaapput. Apeqqutigineqarajuttunut akissutaasartut tulliuttumi atuarneqarsinnaapput:

Qassinngorlugit tunniunneqassappat?

Tunniussineq tamatigut elektroniskiusumik pisassaaq tamatumalu saniatigut Inatsisartut Siulittaasoqarfiat tamatumunnga aalajangiisimappat pappiaranngorlugit tunniussisoqartassaluni.

• Naalakkersuisut Inatsisissatut aalajangigassatullu siunnersuuteqarnermi, taakkununngalu saqqummiussissutit: elektroniskiusumik nassiussinerup saniatigut kalaallisut pappiaranngortitat 55-it qallunaatullu pappiaranngortitat 55-it tunniunneqassapput
• Nassuiaateqarnerni: elektroniskiusumik nassiussinerup saniatigut pappiaranngortitat 55-it tunniunneqassapput
• Akissuteqaateqarnerni: immikkoortoq aamma agguaanneqassasoq Inatsisartut Siulittaasoqarfiat aalajangersimappat, elektroniskiusumik nassiussinerup saniatigut aamma kalaallisut pappiaranngortitat 55-it qallunaatullu pappiaranngortitat 55-it tunniunneqassapput
• § 37 tunngavigalugu Naalakkersuisunut apeqquteqarnerni: Naalakkersuisoqarfinnit ataasiakkaanit akissutinik katersuinermi Siulittaasup Naalakkersuisoqarfia ataqatigiissaarisuussaaq. Taamaattumik Naalakkersuisoqarfiit Siulittaasup Naalakkersuisoqarfianut saaffiginnittassapput. Aamma taamaaliortoqartassaaq piffissaliussaq eqqortinneqarsinnaanngikkaangat.

Kimut tunniunneqassappat?

Atortut elektroniskinngorlugit inatsisartut@inatsisartut.gl.-imut tunniunneqartassapput. Pappiaranngortitat journaleqarfimmut tunniunneqassapput.

Oqaatsit sorliit piumasaqaatigineqassappat?

Atortut suulluunniit kalaallisut qallunaatullu tunniunneqartassapput. Aamma taama pineqassapput ilanngussat, matumani tusarniaanerni akissuteqaatit ilanngullugit, ilanngullugit nassiunneqartussat. Immikkut pisoqartillugu, assersuutigalugu danskit inatsisaat Kalaallit Nunaanni atortuulissatillugit atortut ilaat qallunaatuinnaq pigineqarsinnaasarput. Aamma taama pisoqarsinnaavoq nunat tamat isumaqatigiissutaannut atatillugu, atortut ilaat tuluttuinnaq pigineqarsinnaasarmata. Taama pisoqartillugu atortut katersat siornanni kalaallisut pingaarnersiuineq ilanngunneqarsimasassaaq.

Atortunut ilanngussat sorliit tunniunneqassappat?

Ilanngussat tamarmik immikkoortunut atortunullu allanut attuumassutillit Allattoqarfimmut tunniunneqartut ilanngunneqassapput.

Piffissat suut killiliussaappat?

• Inatsisissatut aalajangigassatullu siunnersuutit: Ullormi killiliussami nal. 12.00, imaappoq Inatsisartut ataatsimiilernissaat sapaatit akunnerinik 5-nik sioqqullugu tamatuma kingorna  immikkoortup nalunaarutigineqarnissaa Siulittaasoqarfiup tassungaannaq tunngatillugu akuersaarsimanngippagu.
• Apeqquteqaateqarnikkut oqallinnerit: Ullormi killiliussami nal. 12.00, imaappoq Inatsisartut ataatsimiilernissaat sapaatit akunnerinik 5-nik sioqqullugu tamatuma kingorna  immikkoortup nalunaarutigineqarnissaa Siulittaasoqarfiup tassungaannaq tunngatillugu akuersaarsimanngippagu.
• Akissuteqaatit: Kingusinnerpaamik tunniussiffissaliisoqanngilaq, immikkoortulli oqaluuserinissaa kingusinnerpaamik ullormik ataatsimik sioqqullugu tunniussisarneq tunngaviusariaqarpoq.
• § 37 tunngavigalugu apeqqutinik akissuteqartarneq: Taakku tiguneriniit ullut qulit suliffiusut iluanni akissuteqarfigineqassapput. Naalakkersuisulli akissuteqarnissamut killiliussap sivitsorneqarnissaanik Inatsisartut allaffigalugit qinnuigisinnaavaat, assersuutigalugu apeqqut tunngavigalugu sivisunerusumik misissuisoqassatillugu. Qassiunissannik kisitsit siuliani taaneqartartoq takuuk.
• Nassuiaatit agguaassassat: Ulluinnarni nalinginnaasumik allaffimmiittussaanerup nalaani taakku tunniunneqarsinnaapput.
• Inatsisartut ataatsimiinnerini nassuiaatit: Ulloq killiussaq, imaappoq Inatsisartut ataatsimiilernissaat sapaatit akunnerinik 5-nik sioqqullugu tamatuma kingorna  immikkoortup nalunaarutigineqarnissaa Siulittaasoqarfiup tassungaannaq tunngatillugu akuersaarsimanngippagu.

Allagartamik uppernarsaasiisoqassava?

Atortut pappiaranngorlugit tunniunneqartut "allagartaq tungujortoq" Naalakkersuisut tunniussinerminnut ilanngullugu nassiussaat journaleqarfiup uppernarsaasissavaa.