Inatsisartut ullormut oqaluuserisassaannut ilanngutat
Oqaluuserisassat matuma kinguliani allassimasutut ilusillit Inatsisartuni oqaluuserineqarsinnaapput
Siunnersuutinut apeqquteqaatinullu Inatsisartunit suliarineqaqqullugit kissaatigineqartunut Inatsisartut Suleriaasianni ilusiliinissamut piumasaqaatinik arlalinnik aalajangersagaqarpoq, katersuunnerullu ingerlanneqarnissaa sioqqullugu suliassanut Inatsisartunit sulineqartussatut kissaatigineqartunut atatillugu naqitigassanik ilioqqaanissamut, naqitigassat amerlassusissaannut assigisaannullu ilassutitut piumasaqaatinik Inatsisartut Allattoqarfiat suliaqartarpoq.
Oqaluuserisassat, Inatsisartut ullormut oqaluuserisassaattut ilanngutitikkumasat, kingusinnerpaamik Inatsisartut ataatsimiinnissaata pineqartup aallartinnissaa sapaatip akunnerinik tallimanik sioqqullugu piumasaqaatit naapertorlugit saqqummiunneqassapput, Inatsisartulluunniit Siulittaasuannut tunniunneqarlutik.
Aalajangiiffigisassatut siunnersuut Inatsisartuniit saqqummiunneqartoq
Inatsisiliorneq inatsimmulluunniit atuuttumut allannguut Inatsisartunut ilaasortamit Inatsisartunulluunniit ilaasortanit arlalinnit Inatsisartuniluunniit partiit arlaannit siunnersuutit Inatsisartunit aalajangiiffigisassatut siunnersuutitut saqqummiunneqarsinnaapput.
Inatsisartut aalajangiiffigisassaattut siunnersuut Inatsisartut akuersissutigippassuk siunnersuummi pineqartutut imalimmik Inatsisartut inatsisaattut peqqussutissaattulluunniit ittumik siunnersuummik saqqummiussinissamik Naalakkersuisut siuartitsinissamik pisussaaffilerneqarput. Tassa imaappoq, Inatsisartut inatsisaattut peqqussutissaattulluunniit ittumik siunnersuummik ilusiliinissaq piumasaqaatiginagu inatsiseqarnermut tunngasumik siunnersuummik saqqummiussinissamut Inatsisartunut ilaasortaq periarfissaqartoq.
Inatsisartunilli aalajangiiffigisassatut siunnersuutinut ilaatigut ilusissamut piumasaqaateqartoqarpoq, soorlu, siunnersuut tunngavilersuuteqassasoq imalu ilusilimmik oqaasertaqassasoq Inatsisartut aalajangiisinnaallutik. Inatsisartuni aalajangiiffigisassanut siunnersuutit ataasiartamik suliarineqassapput, tassanilu Inatsisartut inatsisissaattut siunnersuutit peqqussutillu siullermeerlugit suliarineqarnerattulli oqaaseqarnissaq piffissalerneqarpoq. Inatsisartut Aalajangiiffigisassaattut siunnersuut ataatsimiititaliamit suliassatut innersuukkumallugu Inatsisartut suliarinninnertik unitsikkallarlugu aalajangersinnaapput. Ataatsimiititaliaq suliarinnittoq isumaliutissiissusiussaaq, ataatsimiititaliallu oqaaseqaatai Inatsisartut siunnersuummik akuersissuteqarnissaannut naapertuunnersut oqaluuserineqareerpat suliarinninneq nanginneqassalluni.
Inatsisartut inatsisissaattut peqqussutissaattulluunniit siunnersuut - Naalakkersuisunit
Naalakkersuisut Inatsisartunilu ilaasortat periarfissaqarput Inatsisartut inatsisissaattut siunnersuutinik aamma Inatsisartut peqqussutissaattut siunnersuutinik saqqummiussinissamut. Inatsisartulli inatsisissaattut aamma peqqussutissaattut siunnersuutit amerlanerpaartaat, Inatsisartuni saqqummiunneqartut, Naalakkersuisunit saqqummiunneqartarput. Oqaatigineqareersutut Inatsisartut inatsisissaattut aamma peqqussutissaattut siunnersuutinut ilusiliinissamut assigiinngitsunik piumasaqaateqartoqarpoq. S.ass. taakku tunngavilersugaasussaatitaapput, inatsisitullu ilusilerlugit saqqummiunneqartussaatitaallutik, soorlutaaq oqaaseqaatinik ilaqartinneqartussaatitaasut. Inatsisartut inatsisissaattut siunnersut aamma peqqussutissaattut siunnersuut Inatsisartuni pingasoriarlugu suliarineqartussaatitaavoq. Siullermeerlugu suliarinninnermi siunnersuut ataatsimut isigalugu pingaarnerutitanik tunngaviusumik oqallinnerugajuppoq. Taamaalinerani allannguutissatut siunnersuuteqartoqarsinnaanngilaq, partiilli oqaaseqartartui nalunaareerajupput allannguutissatut siunnersuutit qanoq ittut saqqummiutilersaaritik.
Tamatuma kingorna siunnersuut nalinginnaasumik Inatsisartut inatsisit malillugit ataatsimiititaliaannit imaluunniit ataatsimiititaliamit ataavartumit suliassanngortinneqartarpoq. Siunnersuulli siunnersuutip suliarineqarnerata nalaani qanoq ilisukkulluunniit ataatsimiititaliamut suliassanngortinneqarsinnaavoq. Taamaalilluni Inatsisartut siunnersuummik suliaqarnertik unitsikkumallugu aalajangersinnaapput, suliarinninnissarlu ataatsimiititaliamut innersuussutigalugu. Taamatut pisoqartillugu suliarinninneq, ataatsimiititaliaq isumaliutissiissuteqarsiillugu, unitsinneqarallartarpoq, tamatumalu kingorna suliarinninneq nanginneqartarluni. Tamannali akuttusuumik pisarpoq.
Inatsisartut inatsisissaattut siunnersuut aamma peqqussutissatut siunnersuut siullermeerlugu suliarinninnerup kingorna amerlanerpaatigut ataatsimiititaliamut suliarineqartussanngortinneqartarpoq. Ataatsimiititaliap suliarinninnini naammassippagu siunnersuutip aappassaaneerlugu suliarineqarnissaanut ataatsimiititaliaq isumaliutissiissuteqartarpoq, tassanilu siunnersuut ataatsimiititaliamit isummerfigineqartarluni; tassunga atasumik allannguutissatut siunnersuuteqartoqarsimappat taanna oqaasertalerneqartarpoq, ataatsimiititamillu tamarmiusumit, imaluunniit amerlanerussuteqartunit ikinnerussuteqartunilluunniit, siunnersuut allatut oqaaseqarfigineqartarluni.
Aappassaaneerlugu suliarinninnermi Inatsisartunit oqaaseqaatit, ataatsimiititaliamit isumaliutissiissummi oqaasertalerneqartut, oqaluuserisarpaat, soorluttaaq partiit oqaaseqartui ilaasortallu allat siunnersuummi immikkuualuttut pillugit oqaaseqarfiginikkajuttut. Aappassaaneerlugu suliarinninnermi, ataatsimiititaliap, tassaniluunniit amerlanerussuteqartut ikinnerussuteqartullu, Inatsisartuni ilaasortaq kinaluunniit, Inatsisartuni partiit kiisalu Naalakkersuisut allannguutissatut siunnersuuteqarsinnaapput. Allannguutissatut siunnersuutit allallugit oqaasertaliugaassapput, oqaluuserineqartumullu attuumassuteqartut suliarineqalinnginnerini ilaasortanut agguaanneqarsimassallutik.
Aappassaaneerlugu suliarinninnerup naammassinerani allannguutissatut siunnersuutaasimasinnaasutut saqqummiunneqartunik Inatsisartut taasissapput, taassumalu kingorna taasissutigineqassalluni siunnersuutip pingajussaaneerlugu suliarineqarnissamut ikaarsaartinneqarnissaa qanoq ilusilerlugu ingerlanneqassasoq. Amerlanertigut imaattarpoq siunnersuut tamatuma kingorna ingerlaannartumik pingajussaaneerlugu suliarineqartoq, Inatsisartulli aalajangersinnaapput siunnersuut aammaarlugu ataatsimiititaliamit suliarineqassasoq. Taamatut pisoqartillugu pingajussaaneerlugu suliarinninnermut ataatsimiititaliaq ilassutitut isumaliutissiissuteqassaaq. Aamma ima pisoqarsinnaavoq Inatsisartut aalajangertut siunnersuut, siullermeerlugu aappassaaneerlugulu suliarineqarnerata akornanni ataatsimiititaliamit suliarinnittuusumit pinnani, ataatsimiititaliamit allamit suliarineqassasoq. Taamatut pisoqartillugu ataatsimiititaliaq alla taanna pingajussaaneerlugu suliarinninnermut isumaliutissiissuteqassaaq.
Oqaatigineqartutulli siunnersuut amerlanertigut nutaamik ataatsimiititaliamut suliaritinngikkaluarlugu ingerlaannartumik pingajussaaneerlugu suliarineqalersarluni. Pingajussaaneerlugu suliarinninnermi ataatsimiititaliamit suliarinnittuusimasinnaasumit imaluunniit tassani amerlanerussuteqartunit ikinnerussuteqartunillu, Naalakkersuisunit imaluunniit Inatsisartuni ilaasortanit sisamaasunit ataatsimoortunit allannguutissatut siunnersuuteqartoqarsinnaavoq. Allannguutissatut siunnersuuteqartoqarsimatillugu taakku taasissutigineqassapput, tamatumalu kingorna Inatsisartut siunnersuut, ilusissavimmisut iluseqarnera aallaavigalugu, sivikitsumik oqaluuserisinnaallugu. Tamatuma kingorna siunnersuut akuersissutigitikkumallugu taasissutigineqassaaq.
Oqallinnissamik siunnersuut
Inatsisartuni ilaasortaq pisortat susassaqarfiannut tunngasumik Inatsisartut ataatsimiittarfianni isumaqatigiinniutigineqartussamik oqaluuserisassanngortitsiniarpat, piumasarippagulu Naalakkersuisuni ilaasortap ilaasortalluunniit tassunga nassuiaateqarnissaat, ilaasortaq apeqquteqaateqarsinnaavoq, allallugu aalajangersimasumillu oqaasertalerlugu Inatsisartut siulittaasuannut tunniunneqartumik.
Inatsisartut siulittaasuata apeqquteqaat Inatsisartunut nalunaarutigissavaa, tamatumalu kingorna Inatsisartut aalajangissallugu apeqquteqaat saqqummiunneqartariaqarnersoq.
Apeqquteqaat ataasiarlugu suliarineqassaaq, tassanilu apeqquteqaateqartoq Naalakkersuisullu, partiit oqaaseqartui, Inatsisartunilu ilaasortat allat oqallinnermi peqataasinnaallutik. Inatsisartut suleriaasissaannut ilanngutami piffissat oqaaseqarsinnaatitaaffiit, apeqquteqaatinik oqaluuserinninnermut atortuusut, takuneqarsinnaapput Apeqquteqaammik oqaluuserinninnermi aalajangiisoqarsinnaanngilaq.
Nassuiaatit nalunaarutillu
Siunnersuutit qulaani taaneqartut saniatigut Naalakkersuisut suliassanik allanik Inatsisartunut suliarisassanngortitsillutik nassiussisarput. Tamakku nalunaarusiaasinnaapput, danskit inatsisaannut Kalaallit Nunaannut atortussanngortinniakkanut Namminersornerusuniit suliamut oqaaseqarfiginninnerusinnaalutik aamma nunat allat isumaqatigiissutaasa assigisaasalu Kalaallit Nunaannit akuersissutigineqarnissaannut tunngasumik Inatsisartuniit oqaaseqarfiginninnerusinnaallutik.
Suliat taamaattut ataasiarlugit suliarineqartussaapput, nalinginnaasumillu taakku suliarineqarneri ataatsimiititaliami suliarineqarnissaat siunertaralugu unitsinneqarneq ajorlutik, aammalu partiit partiit qinikkallu allat oqaaseqartuutitaannit suliamut oqaaseqarfiginnittoqartarluni.
