Inatsisit Tunngaviusut § 82-iat naapertorlugu kommunit imminnut atasutigut namminersorlutik naalagaaffimmit nakkutigineqarlutik ingerlatsisinnaasuunissaat aaqqissuunneqassaaq.
Kalaallit Nunaanni hjemmestyre pillugu inatsisikkut ”Kalaallit Nunaannik aqutsineq” Namminersornerullutik Oqartussanut nuunneqarpoq, taassumalu kommuninik nakkutilliisussaatitaaneq naalagaaffimmit tigullugu.
Kommunit aqunneqarnerat pillugu Inatsisartut inatsisaat nr. 14, 5. december 2008-mersumi (Nakkutilliinermut inatsisikkut) malittarisassat aalajangersarneqarput.
§ 59-imi oqaatigineqarpoq:
Nakkutilliisoqarfimmi ilaasortaapput
1) Naalakkersuisut siulittaasuat, nakkutilliisoqarfimmi siulittaasuusoq,
2) ilaasortat marluk inatsisartunit inatsisartunut qinersisoqareerneri tamaasa qinerneqartussat aamma
3) ilaasortat marluk Kanukoka-mit kommuninut qinersisoqareerneri tamaasa kommunalbestyrelsinut ilaasortanngor-tut akornanni qinerneqartussat.
Imm. 2. Ilaasortat tamarmik minnerpaamik ataatsimik sinniisussaqassapput, ataatsimiigiaqqullugit aggersarneqarsinnaasunik ilaasortaasup pisinnaannginnerani.
Nakkutilliisoqarfik ukiumut minnerpaamik ataasiarluni ataatsimiittassaaq, ataatsimiittassallunilu siulittaasup ilaasortalluunniit pingasut tamanna pisariaqartutut isigigaangassuk.
Nakkutilliisoqarfik aalajangiisinnaassuseqarpoq siulittaasoq ilaasortallu allat minnerpaamik marluk peqataappata. Aalajangiinerit taasinermi amerlanerussuteqarnikkut pisassapput. Naligiittoqarpat siulittaasup taasinera aalajangiisuussaaq.
Naalakkersuisut Nakkutilliisoqarfik allattoqartissavaat.
Kommuninik Nakkutilliisoqarfiup nakkutigissavaa kommunalbestyrelsit ingerlatsinerminni inatsisartut inatsisaanni matumani maleruagassat malinneraat aammalu pisortani maleruagassat atuuttut naapertorlugit ingerlatsinersut.
Nakkutilliinermut qulaani taaneqartumut ilaatinneqarput Nakkutilliisoqarfiup qisuariaateqarnissamut periarfissarisai, taakkununnga ilaatigut ilaallutik pinngitsaaliinikkut akiliisinneqarsinnaaneq. Qisuariaateqarnissamut periarfissat nakkutilliinermut inatsimmi §§ 61-63-mi erseqqinnerusumik nassuiaatigineqarput.
Piffissaq qinigaaffik
Ilaasortanik marlunnik sinniisussanillu marlunnik Inatsisartut toqqaanerat pisassaaq nutaamik qinersinerup kingorna inissitsiterluni ataatsimiinnermi. Pisariaqartillugu ilassutitut toqqaaneq ingerlanneqarsinnaavoq.