Inatsisartut tulliani ataatsimiinnissaat

2024-mi Inatsisartut Ukiakkut Ataatsimiinnissaat:

2024-mi Ukiakkut Ataatsimiinneq (UKA24) tallimanngornermi ulloq 20. september 2024 aallartilluni ingerlanneqalissaaq.

2024-mi Ukiakkut Ataatsimiinnermut oqaluuserisassanut siunnersuutinik ilanngunneqaqqusanik tunniussinissamut killigititaq taamaalilluni tassaassaaq tallimanngorneq ulloq 16. august 2024 nal. 12.00.

**********************************************************************************

Ileqquusumik ataatsimiittarnerit.

Inatsisartut minnerpaamik ukiumut marloriarlutik ileqquusumik ataatsimiittussaatitaapput. Inatsisartut ukiuat septembarip qaammataani tallimanngornerit aappaanni aallartittarpoq ukiullu tulliani tallimanngorneq taanna tikillugu ingerlasarluni.

Inatsisartut Siulittaasuata pisariaqartutut isigippagu Inatsisartuttaaq immikkut ittumik qasseriarlutilluunniit ataatsimiissinnaapput.

Inatsisartut ataatsimiittussaapput Naalakkersuisut Siulittaasuata, minnerpaamilluunniit Inatsisartunut ilaasortat affaasa piumasarippassuk.

Immikkut ittumik ataatsimiinnerni Inatsisartut suliassat, immikkut ittumik ataatsimiigiaqqusinermut tunngaviliisuusut, taamaallaat suliarisussaavaat.

Inatsisartut ataatsimiinnerinut atasumik Siulittaasoqarfik ullormut oqaluuserisassanut ataatsimiititaliatut atuuttussaavoq.

Tassa imaappoq, Siulittaasoqarfik siunnersuutinik, apeqqutinik il. il., ataatsimiinnermik pineqartumi suliarisassangortitanik qanoq suliarineqarnissaannik Inatsisartunit akuersissutigisassamik inassuteqaasiortussaasoq.

Ataatsimiinneq aallartitsinnagu Siulittaasoqarfik siunnersuutinik, apeqquteqaatinik il. il., Inatsisartunut ilaasortanut ataatsimiinnissami isumaqatigiinniutigineqartussatut naatsorsuutigisanik allattukkamik takussutissiortussaavoq.