FM 2003/37 - Imaanut aqqartartutut suliaqarneq aqqartartullu atortui il.il. pillugit inatsisip Kalaallit Nunaanni... (Attaveqaqatigiinnermut, Avatangiisinut Ineqarnermullu Naalakkersuisoq)
20. januar 2003 FM 2003/37
Imaanut aqqartartutut suliaqarneq aqqartartullu atortui il.il. pillugit inatsisip Kalaallit Nunaanni atortuulersinneqarnissaanik peqqussutissatut siunnersuummut Namminersornerullutik Oqartussat oqaaseqaateqarnissaat pillugu inatsisartut aalajangiiffigisassaattut siunnersuut.
(Attaveqaqatigiinnermut, Avatangiisinut Ineqarnermullu Naalakkersuisoq)
Saqqummiussissut
Siullermeernera
Naalakkersuisut matumuuna @Imaanut aqqartartutut suliaqarneq aqqartartullu atortui il.il. pillugit inatsisip@ Kalaallit Nunaannut atuutilersinneqarnissaanik siunnersuut saqqummiuppaat.
Kalaallit Nunaanni imaanut aqqartartut pillugit inatsit 1979-imeersoq atuuppoq, Danmarkimili imaanut aqqartartut pillugit inatsit nutaaq 1995-imi atuutilerluni. Inatsit taanna aqqartartut ilinniartitaanerannik, aqqartartut peqqissusissaannut piumasaqaatinik, aqqartartutut allagartat uppernarsaatit aqqartartullu atortui kiisalu aqqartartutut sulinermi avatangiisinut ileqqussanik isumannaarinninnermik imaqarpoq. Aqqartartut pillugit inatsit ukiunik 20-nik pisoqaassusilik nutarterneqassaaq, ullumikkut aqqartartutut sulinermi isumannaallisaanissaq aqqartartullu atortuisa isumannaatsuunissaannik piumasaqaatinut naleqquttunngorsarneqarniassammat.
Danskit kalaallillu inatsisaanni assigiinngissut pingaarnerpaaq tassaavoq, peqqussummi Kalaallit Nunaanni aqqartartutut suliassanut inuussutissarsiutigalugu aqqartartuinnarnik atuinissamut periarfissat killeqarnerat isiginiarneqarmat. Taamaalilluni periarfissiisoqarpoq aamma inuit inuussutissarsiutigalugu aqqartartutut allagartaqanngikkaluit Kalaallit Nunaanni aqqartartutut suliassanik suliaqarsinnaanissaannut, aammali inuussutissarsiutiginagu aqqartartut Nuummi Søfartsstyrelsip allaffianut akuersissummik piniareernermikkut taama periarfissinneqarput.
Naalakkersuisut siunnersuutaat Kalaallit Nunaanni imarsiornermi inatsisit pillugit nalunaarusiami, Inatsisartut ilaasortaannut ukiakkut 2000-imi agguaanneqartumi, inassuteqaatigineqartunut naapertuuppoq.
Taamatut oqaaseqarlunga imaanut aqqartartutut suliaqarneq aqqartartullu atortui il.il. pillugit inatsisip Kalaallit Nunaanni atortuulersinneqarnissaanik peqqussutissatut siunnersuummut Namminersornerullutik Oqartussat oqaaseqaateqarnissaat pillugu inatsisartut aalajangiiffigisassaattut siunnersuut inatsisartunut akuersaartumik suliassanngortippara.