Ullormut oqaluuserisassat

Ullormut oqaluuserisassanut nassuiaat.

Nunatsinni sikusiutinik umiarsuaqalernissaq siunertaralugu Naalakkersuisut dansk-it Naalakkersuiusuinut saaffinginninnissaanik peqquneqarnissaannik Inatsisartunut aalajangiiffigisassatut siunnersuut.

Kalaallit Nunaat tamakkerlugu ulluunerani paaqqinnittarfinni, tassunga ilanngullugit meeraaqqerivinni meeqqerivinnilu, angajoqqaat akiliisarnerisa atorunnaarsinneqarnerata qanoq kinguneqarsinnaanerata misissorneqarnissaanut Naalakkersuisut peqquneqarnissaannik Inatsisartut aalajangiiffigisassaattut siunnersuut. Misissuinermi angusat kingusinnerpaamik UPA2027-mi saqqummiunneqassapput.

Nunatsinni meeqqiornissaq meeqqanillu pilersuinissaq aningaasatigut oqinnerulersinniarlugu kajuminnarnerulersinniarlugulu, inatsisiliornerup pisortallu aaqqissuussaanerisa qanoq ineriartortinneqarsinnaanerat pillugu Naalakkersuisut nassuiaammik suliaqaqqullugit Inatsisartut aalajangiiffigisassaattut siunnersuut. Nassuiaammi periarfissat assigiinngitsut, taakku ilaqutariinnut meerartalinnut innuttaasut amerlassusaasa ineriartornerannullu qanoq sunniuteqarnissaat naatsorsuutigineqarnersoq kiisalu aningaasatigut kingunerisassaat qulaajarneqassapput. Nassuiaat siunissami politikkikkut aalajangiinissamut tunngavissatut atorneqassaaq, kingusinnerpaamillu UPA 2028-mi Inatsisartunut saqqummiunneqassalluni.

Naalakkersuisut Kalaallit Nunaanni motorcykelinik eqqussinissamik sananissamillu inerteqquteqarneq pillugu Kalaallit Nunaannut inatsit nr. 186, 14. maaji 1980-imeersoq atorunnaarsinneqarnissaa pillugu Folketingimi inatsisissatut siunnersuummik saqqummiussisoqarnissaa anguniarlugu naalagaaffimmi oqartussaasunut saaffiginninnissamut peqquneqarnissaat pillugu Inatsisartut aalajangiiffigisassaattut siunnersuut. Saaffiginnissuteqarnermi aamma tamanna pissutigalugu Kalaallit Nunaannut maleruagassani pisariaqartunik allannguuteqartoqarnissaa anguniarneqassaaq.

Naalakkersuisut aqqusinikkut angallannermut tunngasunik suliassaqarfiup Kalaallit Nunaanni Namminersorlutik Oqartussanit tiguneqarnissaanut inatsisissatut siunnersuutinik pisariaqartunik kiisalu tigusinerup qaqugu qanorlu piviusunngortinneqarnissaanut pilersaarummik kingusinnerpaamik UKA 2027-mi saqqummiussinissamik peqquneqarnissaannik Inatsisartut aalajangiiffigisassaattut siunnersuut, tak. Kalaallit Nunaanni Namminersorneq pillugu inatsimmi §§ 2 aamma 3, imm. 1, kiisalu inatsip ilanngussani nalunaarsukkat I, litra c.

Qimusserluni umimmanniarnermut immikkut ilassutitut pisassiissummik aalajangersaanissaamik siunnersuuteqarnissamut Naalakkersuisut kingusinnerpaamik UPA2027-mi saqqummiussinissaannik peqquneqarnissaannik Inatsisartut aalajangiiffigisassaattut siunnersuut. Ilassutitut pisassiissutit annertussusaat kiisalu qanoq ilusilersorneqarnissaat agguaanneqarnissaallu biologit siunnersuinerat aammalu soqutigisaqaqatigiit attuumassuteqartut tamaasa suleqatigalugit aalajangersarneqassapput.

Kalaallit Nunaanni inuussutissarsiutigalugu piniartut pisarisaminnik annertunerusumik aningaasarsiorsinnaalernissaat anguniarlugu, piniakkanit tunisassiat Kalaallit Nunaata iluani avataanilu tuniniarneqarsinnaanerisa annertusarneqarnissaat anguniarlugu Naalakkersuisut suliniuteqaqqullugit Inatsisartut aalajangiiffigisassaattut siunnersuut.
Suliniummi aamma Naalakkersuisut 2023-mi aalajangiinerat, Tunumi qilalukkat qernertat qaqortallu neqaat mattaallu Kalaallit Nunaata Kitaanut aammalu Qallunaat Nunaannut nassiunneqarsinnaanerannik killilersuisoq, immikkut nalilersoqqinneqassaaq.