Inatsisartut Siulittaasuata Folketingip siulittaasua Søren Gade ataatsimeeqatigaa

Inatsisartut Siulittaasuata Kim Kielsenip folketingip siulittaasua Søren Gade ulloq 6. maj ataatsimeeqatigaa.

Inatsisartut Siulittaasuat folketingimut pingaarnertut majuartarfimmi pisortatigoortumik tikilluaqquneqarpoq. Ataatsimiinnerminni qinersinerup inernera aammalu ulloq 11. marts qinersinerup kingorna Inatsisartut katitigaanerat nutaaq Inatsisartut Siulittaasuata paasissutissiissutigai. Tamatuma saniatigut suliassaqarfiit Inatsisartut Folketingillu akornanni suleqatigiinnikkut nukittorsaaffigissallugit soqutigineqartut siulittaasut oqaluuseraat. Folketingimi nutserisoqarfimmik pilersitsiniarnerannut atatillugu Inatsisartut allaffeqarfiat Folketingip allaffeqarfianut kingullermik siunnersuilluni ikiuuppoq.

Inatsisartoqarfiit marluk taakku akornanni suleqatigiinnerup nukittorsarneqarlunilu qaninnerulernissaa Inatsisartut Siulittaasuata qilanaaraa.