Inatsisartut Siulittaasuata Norgemi inatsisartut Stortingip Siulittaasua pulaarpaa

Inatsisartut Siulittaasuat Kim Kielsen Stortingip siulittaasuanit Oslomi ulloq 7. maj pisortatigoortumik tikilluaqquneqarpoq.

Stortingip siulittasua siulittaasoqarfialu tamarmiusoq ataatsimiinnermi peqataapput, tamatumani marsimi qinersinerup kingorna Inatsisartut katitigaanerat aammalu qinersinerup kingorna Kalaallit Nunaata soqutigineqarnerujussua pillugit Inatsisartut Siulittaasuat Kim Kielsen paasissutissiivoq. Tassunga atatillugu Norgep Kalaallit Nunaannut tapersersuinera nuannaarutigalugu siulittaasup oqaatigaa Stortingillu qanimut pitsaasumillu suleqatigineqarnerata ingerlaqqinnissaa qilanaaralugu. 

Issittumi Siunnersuisoqatigiiffimmi siulittaasuuffiup ulloq 12. maj Naalakkersuisunut tunniunneqarnera Siulittaasup nuannaarutigaa, ammattaaq Nunat Avannarliit Siunnersuisoqatigiiffiata Norgemit tapersersorneqarnera Siulittaasup nuannaarutigaa nunani avannarlerni inatsisitigoortumik naalakkersuisutigoortumillu suleqatigiinnermi Kalaallit Nunaata naligiinnerusumik ilaasortaanissaanut qulakkeerinneqataammat.

Stortingip Nunat Avannarliit Siunnersuisoqatigiiffianni aallartitai aammalu issittumi suleqatigiinnermut aallartitai siulittaasup ataatsimeeqatigaattaaq. Tassani Kalaallit Nunaannut akuersaarneq tapersersuinerlu aammalu naligiimmik suleqatigiinnissap tapersersorneqarnera aamma ersersinneqarput.

Taamaalillutillu Stortingip issittumi siunnersuisoqatigiinnut aallartitaasa piffissami qaninnerusumi aammalu Stortingimut qinersinissaq 8. september 2025-mi pisussatut naatsorsuutigineqartoq sioqqullugu Kalaallit Nunaannut tikeraarnissartik kissaatigaat.

Norgep nunap inoqqaavisa piginnaatitaaffiinik piginnaatitaaffiillu taakku attatiinnarneqarnissaannik sulissutiginninnini nangissagaa kissaatigigini siulittaasup oqaatigaa, taamatuttaaq Inatsisartut Norgemilu Saamit inatsisartuisa Sametingip akornanni pingaarutilimmik pitsaasumillu suleqatigiinneq nukittorsarneqartussatut aamma kissaatigineqartoq Inatsisartut Siulittaasuata paasissutissiissutigaa.

Assit: Peter Mydske/Stortinget