Nutaarsiassaq 17.06.2025

17.06.2025

Inatsisartut Nunanut Allanut Sillimaniarnermullu Ataatsimiititaliaat Københavnimut Bruxellesimullu paasisassarsiorluni angalanera

 

Inatsisartut Nunanut Allanut Sillimaniarnermullu Ataatsimiititaliaanni amerlanerussuteqartut nunat tamalaat akornanni susassaqartunik qitiusunik, ilaatigut Danmarkip illersornissamut ministerianik, nunanut allanut ministerianik Folketingimilu apeqqutinut nunanut allanut tunngasunut aalajangiisartutut ataatsimiititaliamik Det Udenrigspolitiske Nævnimi, inerititaqarfiusunik ataatsimeeqateqartarnini naammasseqqammerpai. Taakku saniatigut ataatsimiititaliaq Europap inatsisartuini Europa-Parlamentimi Sillimaniarnermut illersornissamullu ataatsimiititaliap siulittaasuanik kiisalu Nunanut allanut ataatsimiititaliap siulittaasuata tullianik naapeqateqarput. Paasisassarsiorluni angalaneq Belgiami Bruxellesimi NATO-p qullersaqarfiani ataatsimeeqateqartarnernik assigiinngitsunik naammassineqarpoq.

 

Nunarsuarmi allanngoriartupiloortumi Kalaallit Nunaata inissisimanerata nukittorsarneqarnissaanik aammalu ersarissarnissaanik ataatsimiititaliap ataatsimeeqateqartarneri siunertaqarput. Oqaloqateqartarnerni qulequttat qitiusut tassaasimapput ataatsimiititaliamut ilaasortat pissusiviusut tunngavigalugit ilisimasat pillugit paasissutissanik tutsuiginartunik pissarsisinnaanissaat, tassunga ilanngullugit Kalaallit Nunaata soqutigisaanik ataqqinnittunik suleqatissanik pissarsiornissaq suleqatigiinnernillu pioreersunik nukittorsaanissaq kiisalu suliassaqarfinnik EU-mik suleqateqarnerunissamut periarfissaqarfiusunik suussusersiniarnissaq.

 

Nunanut Allanut Sillimaniarnermullu Ataatsimiititaliaq taamatut paasisassarsiorluni angalanerni Inatsisartut avammut kiinnernerisarpaat, angalanerullu ilaatigut takutippaa nunanut allanut tunngatillugu naalakkersuinikkut ingerlatsinermik nukittuumik Kalaallit Nunaanni ineriartortitsisoqartoq.

 

Nunarsuatsinni sumi inissisimaneq tunngavigalugu naalakkersuinermik ingerlatsinermi allanngoriartornerit taakkulu Kalaallit Nunaannut sunniutigisinnaasaannik paasisimasaqalernissaq paasinninnissarlu ataatsimiititaliamut ilaasortanut pingaaruteqarsimavoq, taamatullu aamma ”Amerikarmioorusunngilagut, qallunaajorusunngilagut, kalaalliuvugut” ataatsimiinnernut ersersinneqartarnissaa ataatsimiititaliamut pingaaruteqarsimalluni.

 

Ataatsimiinnerit taakku aqqutigalugit Nunanut Allanut Sillimaniarnermullu Ataatsimiititaliap nunat tamalaat akornanni suliniaqatigiiffinni Kalaallit Nunaata tusaaniarneqarluni ataqqineqarnissaa qularnaarniarlugu siunnerfilimmik sulisimavoq. Kalaallit Nunaata kulturikkut kinaassutsini qimanngikkaluarlugu attaveqaatinik ataqqeqatigiinnermik paaseqatigiinnermillu tunngavilinnik pilersitsiartuaarnissaq pingaartinneqarsimavoq.

 

 

 

Pipaluk Lynge

Nunanut Allanut Sillimaniarnermullu Ataatsimiititaliap siulittaasua

Passissutissat sukumiinerusut ataatsimiititaliap siulittaasuanut oqarasuaat +299 56 25 56 attaveqarluni pissarsiarineqarsinnaapput