Inatsisartut Siulittaasuata Kim Kielsenip ulloq 11. februar 2026-mi Paamiuni Nielsêrak’ Jakobsen sølviusumik Nersornaaserpaa

Inatsisartut Siulittaasuata Kim Kielsenip Paamiuni kommunip allaffeqarfiani nalliuttorsiorpalaartumik katerisimaarnermi Nielsêrak’ Jakobsen sølviusumik Nersornaaserpaa.

Nielsêrak’ Jakobsen ukiorpassuarni Paamiuni namminersortutut inuussutissarsiutigalugu najukkamilu aalisarnerup iluani suliffissaqartitsiniarnermi qulakkeerinneqataanerminut sølviusumik Nersornaaserneqarpoq.

Inatsisartut Siulittaasuata Nielsêrak’ Jakobsenimut oqalugiarnermini ilaatigut makku erseqqissaatigai:

“Ukiorpassuarni namminersortutut pimoorussillutit aalisartuusimanerit aammalu Imarsiornermik Ilinniarfimmi ilinniartunut ilinniarnermut atatillugu sulinermik misiliiffissanik qulakkeerinneqataasarsimanitit tunngavigalugit Nersornaammik sølviusumik Inatsisartut Siulittaasoqarfiata nersornaaserpaatit. Aalisartuunermilu kinguaariit nikinneranni aammattaaq iluatsittumik ingerlatitseqqipputit.

Kinguaatit aalisarnermik piniarnermillu aammalu ukiup qanoq ilinera aallaavigalugu pilinissaannik ilinniartippatit.

Anaanavit ilaqutariit amerliartortunik paarsinerinik, erninilu marluk aalisariaqatigalugit aalisarnermik ilinniartitsinera tamanik aallarniutaasoq oqaluttuarineqartarpoq. Meeqqat atuarfiani atualernalli angajut Elias Jakobsen aalisariaqatigisalerpat. Taamaasillutillu aalisarnermik inuussutissarsiuteqarnissat meeraaninni siusissukkut aalajangiuppat.

Piffissami allaanerusumi ilaqutariillu isertitaqarnikkut ikioqatigiittariaqartarnerisa pingaaruteqarluinnarfiani peroriartorputit, angallatinullu naalaganngorniarnissaraluavit aallartinnissaa taamaasillutit angumerinngitsoorpat. Taarsiullugu aalisartoq Skagenimeersoq ikiffigalugu aalisartutut suliffigilerpat inuussutissarsiutigalugulu aalisarnermik misilittagaqarfigilerlugu. Siunissat ilinniarnissallu allatut pilersaarusiorneqaraluarpoq aalisartuunissalli aalajangiusimalluinnarsimavat.

Aalisartuunerillu aqqaneq marluinnarnik ukioqarlutit aallartippat, angajullu aalisariummik 20 fodsimik pisivusi, kingusinnerusukkullu aalisariummik 42 fodsimik taarserparsi. Ukioq 1978-imilu nukkallu angallammik nutaamik GR5-148 - Anêrak’-mik nangillugu inerisaavusi, kingusinnerusukkut kisermaatilikkannik. Ukioq 1988-imilu kilisaatitut raajarniutitut inerisarneqaqqippoq. Ukiorpassuarni eqeersimaarlutit aalisartuulluarsimanernik tamanna takutitsivoq, aalisarnermillu inuussutissarsiuteqarnermi suliassaqarfik ineriartortuartumi qanoq nalimmassarluarlutillu iluatsittumik ingerlalluarsimaninnik takussutissiivoq. 

Aalisarnerullu inuussutissarsiutitut qanoq nikerarsinnaatiginera tamavitta ilisimavarput, minnerunngitsumik aalisakkat aalajangersimasut tammakarnerisa nalaanni piffinnut nutaanut nalimmassartariaqartarsimanitit eqqarsaatigalugit.

Paamiuni aalisarnerup appariarfiani aalisartunik allanik aalisaqatissaqanngiffinni bundgarnersorlutit kisivit aalisartariaqartarputit. Piumassuseqarnerit, uteriitsuunerit, nutaanik sammisaqarusuttarnitit neriulluartuarnerillu nukittoqqutigivatit. Aalisakkat aalajangersimasut tammakarnerini aalisartut allat uniinnartut akornanni, illit tunisassiassanik nutaanik aalisakkanik aalisagassarsiorlutit ingerlaqqittarputit. Qalerualinnillu tunisassiorneq 1990-ikkut naaneranni aallartinneqarmat aalisakkerivinnut tunisaqarluartunut ilaavutit. Tassungalu atatillugu pisoq immikkuullarissoq oqaluttuassartaqarpoq. Paamiuni tunitsivimmi sulisup tunisilersutit takugamitit aperimmatit aqaguani tuniseqqissamaarnersutit, taamaanngippammi aalisakkerivik matoqqasariaqassammat aalisakkerivimmilu sulisut isertitassaqaratik. 

Aalisarnerpit saniatigut Paamiuni Aalisartut Peqatigiiffianni ukiorpaalunni aamma suliaqarputit. Paamiunilu tunisinerpaasimasutut arlaleriarlutit agguagarsisarputit. Tamannalu pillugu KNAPK-mit arlaleriarlutit nersorneqartarlutit, soorluttaaq Carl Egedep aningaasaateqarfianit nersornaaserneqarsimasutit. Taaneqartut saniatigut Paamiuni aalisartut piniartullu kattuffiani immikkoortortaqarfimmi KNAPP-mi ataqqinaatitut ilaasortaavutit. Maannalu ukioqqortusigaluarlutit suli aalisakkerivimmut tunisiuartutit taassallugu aamma pingaaruteqarpoq.

Aalisarnermik inuussutissarsiornermi pimoorussinitit siammaseqaat suliatillu annertoorujussuupput, pisumili matumani tamakkerlugit taagorneqarsinnaagunanngillat.”

Siulittaasoqarfik sinnerlugu

Inatsisartut Siulittaasuat Kim Kielsen