Inatsisartut Allattoqarfianni sulinermi atugassarititaasut 

Inatsisartut Allattoqarfianni sulinermi atugassarititaasut pillugit Sermitsiaq arlalinnik allaaserisaqarpoq. Allaaserisat tulliuttunik oqaaseqaateqarnissamut pissutissaqalersitsipput.

Inatsisartut Allattoqarfiata allattoqarfimmi sulisut pingaartippai ingerlaavartumillu suliffimmi avatangiisinik pitsaasunik pilersitsinissaq attassinissarlu sulissutigalugit. Inatsisartut Allattoqarfiata sulisut ilorrisimaarnissaat aalajangiisuusumik pingaartippaa.

Inatsisartut Allattoqarfianni sulisut Djøf-imut ullumikkut ilaasortaasut Inatsisartut Allattoqarfianni suliffimmi avatangiisit naammaginartutut isigaat Djøf-imullu saaffiginnissuteqarnissaq pissutissaqartissimanagu.

Sermitsiap allaaserisartagaani Inatsisartut Allattoqarfiani ukiuni siusinnerusuni suliffimmi avatangiisiusimasut pitsaanngitsorujussuartut allaaserineqartarneri pasilliinerilluunniit sakkortoorujussit allattoqarfiup ilisarisinnaanngilai. Allattoqarfimmi aqutsisunik kinaassutsimik isertuussilluni, tunngavilersugaanngitsumik sakkortoorujussuarmillu pasilliinerit Inatsisartut Allattoqarfiata akuerisinnaanngilluinnarpai.

Sermitsiap allaaserisartagaani suliffimmi avatangiisit ullumikkut atuuttut allaaserineqanngillat. Inatsisartut Allattoqarfiat isumaqarpoq Sermitsiap allaaserisartagai qanga pissusiusimasunik siusinnerusukkullu sulisuusimasut suliffimmi avatangiisinik namminneq isiginninnerannik aallaaveqartut. Sermitsiap allaaserisartagaani Inatsisartut Allattoqarfianni suliffimmi avatangiisit ullumikkut atuuttut sunnguamilluunniit misissorneqarsimanngillat takussutissiorneqaratillu.

Sermitsiap allaaserisartagai Inatsisartut Allattoqarfianni siusinnerusukkut sulisuusimasut Dansk Jurist- og Økonomforbundimut (Djøf-imut) ilaasortat kinaassutsiminnik isertuussillutik oqaaseqaataannik tunngaveqarput. Inatsisartut Allattoqarfiat 2023-mi aggustimi allattoqarfimmi suliffimmi avatangiisit Djøf peqatigalugu eqqartorpaat. Pissutsit taamanikkut Djøf-ip Inatsisartut allattoqarfiannut saaffiginnissutaanut tunngaviusut Sermitsiap allaaserisartagaanut tunngaviusutulli qanga pissusiusimasunik siusinnerusukkullu sulisuusimasut suliffimmi avatangiisinik namminneq isiginninnerannik aallaaveqartutut isigineqarput.

Inatsisartut Allattoqarfiat ulloq 6. oktober 2023 suliffimmi avatangiisit pillugit Djøf-imut ilaasortanik ullumikkut sulisuusunik ataatsimeeqateqarpoq. Djøf-imut ilaasortat ullumikkut sulisuusut Inatsisartut Allattoqarfianni suliffimmi avatangiisinik Djøf-ip allaaserinninnera ilisarisinnaanngilaat. Djøf-imut ilaasortat ullumikkut sulisuusut nalinginnaasumik sulinertik nuannaralugulu ulluinnarni aqutsisuminnik ajornartorsiuteqannginnertik paasissutissiissutigaat. Djøf-imut ilaasortat ullumikkut Inatsisartut Allattoqarfianni sulisuusut peqatigitillugu paasissutissiissutigaat Inatsisartut Allattoqarfianni suliffimmi avatangiisit pillugit Djøf-imut saaffiginnissuteqarsimanatik.

Inatsisartut Allattoqarfiat suliffimmi avatangiisit pillugit sulinermut atatillugu kattuffinnit allanit saaffiginnissutinik allatigut tigusaqarsimanngilaq.

Inatsisartut Allattoqarfiata pissutsit ullumikkut atuuttut siunissamilu atuuttussat pillugit Djøf-imik sulinermullu atatillugu kattuffinnik allanik pitsaasumik suleqateqarnissani qilanaaraa.

Ellen Kolby Chemnitz
Pisortaq
Inatsisartut Allattoqarfiat