Inuiattut ataatsimoorpugut

Nunatta avatitsinnit soqutigineqarnerujussua eqqarsaatigalugu pingaaruteqarpoq ataatsimoornerput innuttaasunut qularnaassallugu.

Kalaallit Nunaat qinikkat aqqutigalugit innuttaasut oqartussaaqataanerat tunngavigalugu aqunneqarpoq inuiattullu eqqissisimasuulluta nunarsuarmik avatitsinniittumik suleqateqarnissamik kissaateqartut.

Kalaallit Nunaanni innuttaasut oqartussaaqataanerat tunngavigalugu aqunneqarnitta illersorneqarnerani ataatsimoorpugut, nunat tamalaat akornanni inatsisit tunngavissallu inuannut tamanut atuuttut aallaavigalugit, soorlu aamma Kunngeqarfimmi iligisattalu akornanni ataatsimoortugut.

Innuttaasut qularutigissanngilaat Inatsisartut ullutsinni pisut qanimut malinnaavigimmatigit Naalakkersuisullu qanittumik oqaloqatigisarlugit, unammilligassaq nunatta maanna inissisimaffigisaa pillugu.

Inatsisartut siulittaasuattut pissutsit pillugit innuttaasut ernummateqarnerat aamma malinnaavigaara innuttaasullu ernummatiminnik oqariartuuteqallaqqinnerat imminnullu qiimmassallaqqinnerat annertoqqutigingaarlugu. Tamanna tamatta ingerlateqqissavarput, taamalu inuiattut ataatsimoornerput qularnaarlugu. Innuttaasut akornanni ataqatigiinneq Inatsisartunut ilaasortat tamarmik taamatuttaaq nukissaminnik aallerfigisarpaat.

Isummatta assigiinngissinnaanerat tamatta immikkut ataqqisariaqarparput, kisiannili aamma inuiattut ataatsimoortariaqarpugut, soorlu aamma meerartatta inuusuttortattalu tusaaniarnissaat eqqaamassagipput.

Nunarput qaamasumik siunissaqaqqullugu ullutsinni inissisimanitta eqqissisimasumik pitsaasumillu inerneqarnissaa tamatta sulissutigisigu Naalakkersuisullu aaqqiissutissanik ilungersornerat tapersersorlugu.

Eqqaamatigu:
Kalaallit Nunaat - Kalaallit pigaat!
Kalaallillu siunissartik namminneq aalajangigassaraat!
Erfalasorpullu nunatsinni qaqugumorsuaq erfattuassaaq!

Kim Kielsen
Inatsisartut Siulittaasuat