Nunat Avannarliit Siunnersuisoqatigiiffiata 2025-mi ataatsimiinnera

Nunat Avannarliit Siunnersuisoqatigiiffiata ukiumoortumik ataatsimiinnera Sverigemi Stockholmimi ulluni 27. – 30. oktober 2025 ingerlanneqarpoq.

 

Nunat Avannarliit Siunnersuisoqatigiiffiannut Kalaallit Nunaannit aallartitat tassaapput:

Justus Hansen, siulittaasoq

Mariane Paviasen Jensen

 

Nunat avannarliit suleqatigiinnerannut Danmark, Finland, Island, Norge aamma Sverige kiisalu Savalimmiut, Kalaallit Nunaat Ålandilu peqataapput. Nunani Avannarlerni Ministerit Siunnersuisoqatigiiffianni suleqatigiinneq naalakkersuisutigoortumik ingerlavoq, Nunat Avannarliit Siunnersuisoqatigiiffiat nunanit avannarlerni inatsisartunut ilaasortat suleqatigiiffigalugu.

 

Sisamanngornermi ulloq 30. oktober 2025 Nunat Avannarliit Siunnersuisoqatigiiffiata Sverigemi Stockholmimi Nunat Avannarliit Siunnersuisoqatigiiffiata ukiumoortumik ataatsimiinnerani peqataasut isumaqatigiillutik Nunat Avannarliit Siunnersuisoqatigiiffiata suleriaasiata allanngortinneqarnissaanut siulittaasoqarfiup siunnersuutaa (Præsidieforslag om ændring af Nordisk Råds forretningsordenen (A 2025/PRE)) akuersissutigaat.

 

Suleriaatsip allanngortinneqarnissaanut siulittaasoqarfiup siunnersuutaani ilaatigut takuneqarsinnaavoq paragraf 22 allanngortinniarneqartoq:

• "Siulittaasoqarfiup siulittaasoq, siulittaasup tullia amerlanerpaamillu qinikkatut ilaasortat amerlanerpaamik 16-it ilaasortai. Danmark, Finland, Savalimmiut, Kalaallit Nunaat, Island, Norge, Sverige aamma Åland partiillu suleqatigiissut tamarmik sinniisuutitaqassapput."

 

Tamanna ilaatigut isumaqarpoq Nunat Avannarliit Siunnersuisoqatigiiffiata siulittaasoqarfiani aalajangiinernut Kalaallit Nunaat oqaaseqarsinnaatitaalissasoq.

 

Aallartitat siulittaasuat Justus Hansen oqarpoq:

“Kalaallit Nunaannut nunallu avannarliit suleqatigiinnerannut ulloq oqaluttuarisaanermi eqqaamaneqartussanngorpoq. Suleriaatsip allanngortinneqarneratigut Kalaallit Nunaat Nunat Avannarliit Siunnersuisoqatigiiffiata siulittaasoqarfianut ilaasortatut namminerisaminik soqutigisani pillugit oqaaseqarsinnaatitaalerpoq. Suleqatigiinnerup siunissaa pillugu pingaarutilinnik aalajangiisoqassatillugu niperput avaqqunneqarsinnaajunnaarpoq.

Taamatut allanngortitsineq Kalaallit Nunaata nunat avannarliit suleqatigiinneranni ilaasortatut namminerisaminik naligiissumillu inissisimanissaa akueritinniarlugu ukiorpassuarni ataavartumik suliniarnerup inerneraa. Siulittaasoqarfimmi oqaaseqarsinnaatitaalluta inissaqalernitsigut Kalaallit Nunaannit isummat pingaarnersiuinerillu nunani avannarlerni nunat allat assigalugit toqqaannartumik saqqummiussinnaalerpagut.

Tamanna Kalaallit Nunaata Nunat Avannarliit Siunnersuisoqatigiiffianni tamakkiisumik ilaasortanngornissaanik Kalaallit Nunaata anguniagaanut alloriarnertut pingaartutut isigaarput. Nunat Avannarliit suleqatigiinneranni Kalaallit Nunaata nunanut naligisatut akuerineqarnissaa qularnaarniarlugu nunani avannarlerni naalakkersuisunik oqaloqateqartarnivut ingerlateqqissavagut.

Pissusissamisoortumik alloriarneq tulleq tassaassagunarpoq Kalaallit Nunaata peqataanerata taamatuttaaq Nunat Avannarliit Ministeriisa Siunnersuisoqatigiiffianni ersersinneqarnissaa, Kalaallit Nunaata nunat allat assigalugit tamakkiisumik naligiissumillu ilaasortanngortinneqarneratigut. Taamaaliorneq Nunat avannarliit tamarmik suleqatigiittut naligiittut tamarmik immikkut nammineq aalajangiisinnaassuseqarnertik suleqatigiinnermullu tunniussaqarsinnaanertik ataqqillugit ataatsimoornerannik nukittuumik naapertuilluartumillu oqariartornerussaaq.”

 

Mariane Paviasen Jensen ilassusiilluni oqarpoq:

”Helsingforsimi isumaqatigiissutip nutarterneqarneranik suliaqarneq aalajangiisuussaaq. Suleqatigiissitami sulineq qaammatini qulini ingerlasimavoq, naalakkersuisullu ukioq ataaseq sinnerlugu isumaqatigiissutip nutarterneqarnissaa suliarisimallugu. Nutarterinerup aatsaat 2027-mi naammassineqarnissaa naatsorsuutigineqarpoq. Utaqqisinnaanerput killeqarpoq suliallu ingerlanera sivitsortuussappat Kalaallit Nunaanni nukivut suliassaqarfinnut allanut atussanerlugit isumaliutigisariaqarparput,” naggasiivoq.

 

Nunat Avannarliit Siunnersuisoqatigiiffiata suleriaasiata allanngortinneqarnissaanut siulittaasoqarfiup siunnersuutaa uani atuarneqarsinnaavoq:
https://www.norden.org/da/nordic-case/praesidieforslag-om-aendring-af-nordisk-raads-forretningsordenen

 

 

Ikinngutinnersumik inuulluaqqusillunga

Justus Hansen

Kalaallit Nunaannit aallartitat siulittaasuat