Naleraq 2025-imi ukiakkut ataatsimiinnissamut inatsisissatut siunnersuummik saqqummiussinissaminut eqqarsaateqartoq sinnerlugu siunnersuut tusarniaatigineqarpoq.

Tunuliaqut
Ulloq 25. marts 2023 Kalaallit Nunaat nalunaaquttat ingerlaqatigiiffiannut UTC -3-mit UTC -2-mut ikaarsaariarpoq, taamaalillunilu nalunaaqutaq nalunaaquttap akunneranik ataatsimik siuartinneqarluni. Ittoqqortoormiilli nalunaaquttaq ingerlaaqatigiiffiannit UTC -1-imit UTC -2-mut ikaarsaariarpoq, taamaalilluni nalunaaqutaq nalunaaquttap akunneranik ataatsimik kinguartinneqarluni.

Innuttaasut ikigisassaanngitsut nalunaaquttat ingerlaqatigiiffiat nutaaq ajornartorsiutitut misigisimavaat nunanilu allani misissuisarsimanerit takutillugu nalunaaquttaq seqinnertarneratalu imminnut naapertuutinnginnerat peqqissutsimut kingulerluuteqartarsinnaasoq.

Ajornartorsiutit aamma taakku aasaanerani nalunaaqutaqartitsinermik aaqqissuussinermut atuupput. Aaqqissuussineq taanna malillugu piffissami marsimi sapaammi kingullermiit oktobarimi sapaammut kingullermut nalunaaqutaq siuartinneqartarpoq.

Siunnersuutip imarisai pingaarnerit
Siunnersuutip malitsigisaanik Kalaallit Nunaat nalunaaquttat ingerlaqatigiiffiannut UTC -3-mut ikaarsaariassaaq. Tamanna isumaqarpoq nalunaaqutaq nalunaaquttap akunneranik ataatsimik kinguartinneqassammat, ullup ilaani nalunaaqutaq 12.00-imiit 11.00-imut allanngortinneqassalluni.

Sumiiffiit Qaanaaq, Tasiilaq Ittoqqoormiullu eqqarsaatigalugit siunnersuutigineqarpoq sumiiffinnut taakkununnga nalunaaquttaq ingerlaqatigiiffii najukkani innuttaasut tusarniareerlugit nalunaarutikkut aalajangersarneqassasut.

Naalakkersuisut aamma periarfissinneqarput nalunaaruteqarnikkut sumiiffiit killilikkat aalajangersimasut allat (taakkununnga ass. ilanngullugit Danmarkshavn aamma Pituffik Space Base) nalunaaquttat ingerlaqatigiiffiannik allamik malinninnissaannut.

Aasaanerani nalunaaqutaqartitsisarnermik aaqqissuussinerup atorunnaarsinneqarnera siunnersuutip taamatuttaaq kingunerissavaa. Taamaattorli silasiorfik Danmarkshavn aamma Pituffik Space Base eqqarsaatigalugit aasaanerani nalunaaqutaq pillugu suli aalajangersaasoqarsinnaassaaq.

Siusinnerusukkut tusarniaaneq
Siunnersuutip pissuseqatingajaa siunnerusukkut tusarniaatigineqarnikuuvoq (UKA 2024/86).

Siunnersuut manna tassannga immikkoortuni marlunni assigiinngissuteqarpoq:

1) Inatsisartut inatsisaata akuerineqarnissaata naatsorsuutigineqartup kingorna ukiup ataatsip missaanik qaangiunnerani Inatsisartut inatsisaata aatsaat atuutilissaaq.

Inuussutissarsiortut nalunaaquttap ingerlaqatigiiffiata allanngortinneqarnissaanik siunnersuutigineqartumut naleqqussarnissamut inuussutissarsiortut piffissaqarnerunissaat tamatumani siunertarineqarpoq.

2) Qaanaami, Tasiilami, Ittoqqortoormiini taakkulu eqqaanni nalunaaquttat ingerlaqatigiiffii, najukkani innuttaasut tusarniareerlugit Inatsisartullu inatsisaata matuma atuutilerneraniit atuuttunik, nalunaarutikkut aalajangersarneqassapput.

Tamatumunnga tunngaviuvoq Qaanaami, Tasiilami Ittoqqortoormiinilu seqerngup qutsinnerpaaffia Kitaani seqerngup qutsinnerpaaffianit nikingammat. Nalunaaquttat ingerlaqatigiiffiannut UTC -3-mut siunnersuutigineqartutut ikaarsaariarnermi taamaalilluni seqineq Kalaallit Nunaata Kitaani nal. 12 missaani qutsinnerpaaffimminissaq. Qaanaami seqineq nal. 14 missaani qutsinnerpaaffimminissaaq, Tasiilami seqineq nal. 11 missaani qutsinnerpaaffimminiissalluni Ittoqqortoormiini seqineq nal. 10 missaani qutsinnerpaaffimminiissalluni.

Taamaattumik Kalaallit Nunaata tamarmi nalunaaquttat ingerlaqatigiiffiannik ataasiinnarmik malinnilernerata ulluinnarni iluaqutissartai nalunaaquttap ingerlaqatigiiffianik piffissamit seqinnerfiusartumit nikingasumik Qaanaami, Tasiilami Ittoqqortoormii eqqaannilu malinninnikkut innuttaasunut ajoqutissartaanut oqimaaqatigiissinneqartariaqarpoq.

Piffissaliussaq
Tusarniaanermi akissutit inatsisartut@inatsisartut.gl-imut nassiuteqquneqarput assilineralu kfr@ina.alla.gl-imut nassiuteqquneqarluni.

Inatsisartut Allattoqarfiata inatsisissatut siunnersuummut oqaaseqaataajunnartut kingusinnerpaamik ulloq 4. august 2025, nal. 12.00 tiguneqareersimanissaat qinnutigaa.



Inatsisissatut siunnersuut

Inatsimmut nassiuaatit