Periaatsit ilusiliinissamullu piumasaqaatit
Suliat Inatsisartunut Naalakkersuisunullu ilaasortat Inatsisartut oqaluuserisassaannut ilanngukkusutaasa ilusilernissaannut piumasaqaatit assigiinngitsut arlallit atuupput.
Suliat Inatsisartunut saqqummiukkusutat ilusilernissaannut piumasaqaatit ataani pineqartut nittartakkami ujalerfissiami saamia tungaaniittumi takuneqarsinnaapput. Apeqqutigineqarajuttunut akissutaasartut tulliuttumi atuarneqarsinnaapput:
Tunniussineq tamatigut elektroniskiusumik pisassaaq tamatumalu saniatigut pappiaranngorlugu tunniussisoqartassaluni. tassami tamatumunnga Inatsisartut Siulittaasuat aamma/imaluunniit Inatsisartut Allattoqarfiat tamatuma saniatigut katersuunnernut tamanut atatillugu Naalakkersuisunut allakkatigut ilitsersuusiortarmat sukumiinerusunik paasissutissartalinnik.
- Naalakkersuisunit inatsisissatut aalajangiiffigisassatullu siunnersuutit, taakkununngalu saqqummiussissutit: elektroniskiusumik nassiussinerup saniatigut kalaallisut pappiaranngortitat 5-t qallunaatullu pappiaranngortitat 5-t tunniunneqassapput. Saqqummiussissut nammineq kingusinnerusukkut tunniunneqarpat, taanna qarasiakkuinnaq nassiunneqarsinnaavoq.
- Nassuiaatit taamaallaat elektroniskimik tunniunneqartasspput
- Nalinginnaasumik akissuteqaatit qarasaasiakkut tunniunneqarnerat naammattarpoq. Kaammattuutigineqarporli akissuteqaatit aamma pappiaranngorlugit nalinginnaasumik amerlassusissaattut amerlassusilerlugit tunniunneqartassasut - minnerunngitsumik immikkoortup pineqartup oqaluuserineqarnissaa sioqqullugu nal. ak. 24-it iluanni akissuteqaat tunniunneqarpat.
- § 37 tunngavigalugu Naalakkersuisunut apeqquteqarnerni: Naalakkersuisoqarfinnit ataasiakkaanit akissutinik katersuinermi Siulittaasup Naalakkersuisoqarfia ataqatigiissaarisuussaaq. Taamaattumik Naalakkersuisoqarfiit Siulittaasup Naalakkersuisoqarfianut saaffiginnittassapput. Aamma taamaaliortoqartassaaq piffissaliussaq eqqortinneqarsinnaanngikkaangat.
Atortut elektroniskinngorlugit inatsisartut@inatsisartut.gl.-imut tunniunneqartassapput. Pappiaranngortitat journaleqarfimmut tunniunneqassapput.
Atortussiat tamarmik kalaallisut qallunaatullu tunniunneqassapput. Atortussat ataatsimiinnermut sorlermut immikkoortutullu normumut sorlermut atanersut nalunaarneqartarnissaat ilanngussanut ilanngunneqartunut atuupportaaq. Pissutsini immikkut ittuni, assersuutigalugu qallunaat inatsisaat Kalaallit Nunaanni atortussanngortinneqassatillugit, atortussat ilai taamaallaat qallunaatuinnaq saqqummiunneqarsinnaasarput. Taamatuttaaq nunat tamalaat isumaqatigiissuutaannut atatillugu taama pisoqarsinnaasarpoq, atortussat ilai taamaallaat tuluttuinnaq saqqummiunneqarsinnaasarmata. Taama pisoqartillugu, atortussiat siulequtaanni kalaallisut imaqarniliortoqartassaaq. Tusarniaanernit akissutinut piumasaqaatit immikkut ittut atuupput, takuuk ataani allassimasut.
Inatsisissatut siunnersuutit eqqarsaatigalugit tusarniaasoqarsimappat taakku inatsisilerinermut teknikikkut najoqqutassiat atuuttut naapertorlugit inatsisissamut siunnersuummut nassuiaatini tamakkiisumik allaaserineqarsimassapput. Tusarniaanermit atortut tulliuttut ilaapput:
• Tusarniaanermit allakkiaq,
• Tusarniaanermit akissutit tiguneqartut,
• Inatsisissatut siunnersuut tusarniaassutigineqartoq,
• Tusarniaanermit akissutit pillugit allakkiaaratarsinnaasoq,
• Inatsisissatut siunnersuummut nalinginnaasumik nassuiaatitaani tamanna allassimanngippat, kina/kikkut tusarniarneqarnissamut kaammattorneqarsimanersut pillugit paasissutissaaratarsinnaasut,
• Tusarniaanermut piffissaliunneqartoq atorneqartoq pillugu paasissutissat.
Tusarniaanermit atortut siunissami Inatsisartut Allattoqarfianut elektroniskinngorlugit tunniunneqaannartassapput. Pissutsit siuliani pineqartut isiginiarneqarpata tusarniaanermit atortut tamaasa nutsernissaat pisariaqanngilaq, kisiannili Ataatsimiititaliami suliaqarnissaq siunertaralugu Inatsisartut ataatsimiititaliaat imaluunniit taassuma allattaa atortussat taakkuluunniit ilaasa nutserneqarnissaannik sukkulluunniit Naalakkersuisunit pissarsiniarsinnaavoq.
Pineqartuni allaanerussutaasinnaasut malillugit qulaani najoqqutassiat taamatuttaaq aalajangiiffigisassatut siunnersuutinut nassuiaatinullu aamma atuupput.
Ilanngussat tamarmik immikkoortunut atortunullu allanut attuumassutillit Allattoqarfimmut tunniunneqartut ilanngunneqassapput.
- Inatsisissatut aalajangigassatullu siunnersuutit: Ullormi killiliussami nal. 12.00, imaappoq Inatsisartut ataatsimiilernissaat sapaatit akunnerinik 5-nik sioqqullugu tamatuma kingorna immikkoortup nalunaarutigineqarnissaa Siulittaasoqarfiup tassungaannaq tunngatillugu akuersaarsimanngippagu.
-
Apeqquteqaat aallaavigalugu oqallinnissamik siunnersuutit: Kingusinnerpaamik tunniussivissaq tassaavoq Inatsisartut ataatsimiinnissaat sapaatip akunnerinik marlunnik sioqqullugu nal. 12.00, tassa immikkoortup kingusinnerusukkut nalunaarutigineqarnissaa Siulittaasoqarfimmit immikkut akuerineqarsimanngippat.
- Saqqummiussissut siunnersuutip/nassuiaatip tassunga atasup tunniunneqarnera ilutigalugu sapinngisamik saqqummiunneqartassaaq. Saqqummiussissutilli qaqugukkut tunniunneqareernissaat pillugu maleruagassaqanngilaq. Saqqummiussissut immikkoortillugu tunniunneqarpat - partiit oqaaseqartartui eqqarsaatigalugit - immikkoortup suliarineqarnissaa kingusinnerpaamik akunnernik 48-nik sioqqullugu tunniunneqareertariaqarpoq.
- Akissuteqaatit: Kingusinnerpaamik tunniussiffissaliisoqanngilaq, immikkoortulli oqaluuserinissaa kingusinnerpaamik ullormik ataatsimik sioqqullugu tunniussisarneq tunngaviusariaqarpoq.
- § 37 tunngavigalugu apeqqutinik akissuteqartarneq: Taakku tiguneriniit ullut qulit suliffiusut iluanni akissuteqarfigineqassapput. Naalakkersuisulli akissuteqarnissamut killiliussap sivitsorneqarnissaanik Inatsisartut allaffigalugit qinnuigisinnaavaat, assersuutigalugu apeqqut tunngavigalugu sivisunerusumik misissuisoqassatillugu. Qassiunissannik kisitsit siuliani taaneqartartoq takuuk.
- Nassuiaatit agguaassassat: Ulluinnarni nalinginnaasumik allaffimmiittussaanerup nalaani taakku tunniunneqarsinnaapput.
- Inatsisartut ataatsimiinnerini nassuiaatit: Ulloq killiussaq, imaappoq Inatsisartut ataatsimiilernissaat sapaatit akunnerinik 5-nik sioqqullugu tamatuma kingorna immikkoortup nalunaarutigineqarnissaa Siulittaasoqarfiup tassungaannaq tunngatillugu akuersaarsimanngippagu.
Atortut pappiaranngorlugit tunniunneqartut "allagartaq tungujortoq" Naalakkersuisut tunniussinerminnut ilanngullugu nassiussaat journaleqarfiup uppernarsaasissavaa.