”Maanna aamma tassa ilaasortaajunnaarnersiutissaminnik imminnut tunisimasorsuupput…! ”

 

KNR-imi allaaserisaq inuit qarasaasiatigut attaveqatigiittarfiini aalassatsitsisimavoq: Inatsisartunut ilaasortat ilaasortaajunnaartut piffissami aalajangersimasumi aningaasarsiaqartinneqaannartarput. Amerlasuut tamanna tupaallatigaat, ilaasalu allaat mamiatsaatigalugu. Inatsisilli oqarput aningaasarsiaqaannassasut. Taamatut aaqqissuussineq aamma nutaajunngilluinnarpoq – malittarisassammi ullumikkutut isikkoqaqqissaarlutik ukiuni 40-ngajanni atuutereerput.

 

Inatsisartunut ilaasortaq ukiut atuuffigisat aallartinneri tamaasa qaammammi ataatsimi affarmilu ilaasortaajunnaarsiuteqarsinnaatitaanermik katersisarpoq. Taamaattorli qanoq sivisutigisumik ilaasortaajunnaarsiuteqarsinnaaneq ammut qummullu killeqartinneqarpoq. Taamaalilluni ilaasortaq kinaluunniit ilaasortaajunnaartoq sivikinnerpaamik qaammatini pingasuni sivisunerpaamillu qaammatini aqqanilinni ilaasortaajunnaarnersiutisisinnaavoq. Ilaasortat ukiorpassuarni atuussimasut taamaalillutik ilaasortanit sivikitsuinnarmik atuussimasunit piffissami sivisunerusumi ilaasortaajunnaarnersiuteqartinneqartarput – kisianni tassa ukioq ataaseq sinnerlugu ilaasortaajunnaarnersiuteqartoqarsinnaanngilaq.

 

Malittarisassat taakku taamatuttaaq Naalakkersuisunut ilaasortanut atuupput.

 

Aaqqissuussinerup siunertaa nalinginnaasumik suliffeqarnermi isumaqatigiissutini atorfeqarunnaarnissamik ilimasaaruteqartarnernut assersuunneqarsinnaavoq: Atuuffimmiit tunuaraanni tamatuma kingorna allamik suliffissarsiornissamut piffissaqalaarnissaq taamaaliornikkut qularnaarunneqartarpoq. Ilaasortaajunnaarsiuteqartitsisarnermik aaqqissuussineqarsimanngitsuuppat qularnanngilaq atuuffiup isumaginissaa, tassa Inatsisartunut ilaasortatut sulinissaq, inuit ilaannit tunuarsimaarfigineqartussaammat. Naalakkersuinermimmi suliaqarneq nalorninartortaqartaqaaq. Qinikkatut qanoq sivisutigisumik sulinissaq ilisimaneqarneq ajorpoq, qinikkatullu suliunnaaraanni suliffissamik allamik tamatigut piareersimasoqartarani.

 

Ilaasortaajunnaarsiuteqarsinnaatitaanermik katersineq taamatuttaaq ilaasortat ”ajunngitsorsiassaasa”, soraarnerussutisiaqalernissamut akileeqataassuteqartarnermik aamma ilaqartut, tamarmiusut ilaattut isigineqartariaqarpoq. Ajunngitsorsiassat tamarmiusut taakku annertussusiat isiginiagassat assigiinnngitsut akornanni oqimaaqatigiissinneqartariaqarpoq. Nunatsinni aningaasaqarniarnikkut pissutsit eqqarsaatigalugit naapertuutinngitsumik annertussuseqartariaqanngilaq, kisiannili aamma atorfinnut taamaaqataanik akisussaaffilinnut taamaaqataanilluunniit suliassaqarfiusunut sanilliullugu pissusissamisuunngitsumik appasissuseqartariaqarani.

 

Inatsisartunut ilaasortat aningaasarsiaat (taamalu aamma ilaasortaajunnaarnersiutaat) nunani avannarlerni inatsisartunut sanilliullugit appasinnerpaapput. Nunami aningaasaqarniarnikkut killilimmik periarfissaqartumi pissutsi aamma taamaattariaqarput.

 

Inatsisartorpassuit – immaqa amerlanerpaat – ilaasortaajunnaarnersiuteqartitsisarput. Taamatut aaqqissuussinerup ilusilersorneqarsimanera nunamiit nunamut assigiinngisitaarpoq.

 

Ass. Folketingimut ilaasortaasimasut ilaasortaajunnaarnersiutaat Inatsisartunut ilaasortaasimasut ilaasortaajunnaarnersiutaannit annertunerujussuupput. Folketingimut ilaasortat aningaasarsiaasa annertunerujussuunerat tamatumunnga pissutaavoq. Kisianni aamma piffissaq ilaasortaajunnaarnersiuteqarfiusinnaasoq Folketingimut ilaasortanut sivisuneruvoq. Folketingimut ilaasortat taamaalillutik qaammatit pineqartup ilaasortaaffigisaasa marlunngorneri tamaasa qaammat ataaseq ilaasortaajunnaarnersiuteqarsinnaatitaapput, taamaattorli sivikinnerpaamik qaammatini arfinilinni sivisunerpaamillu ukiuni marlunni. Akerlianik akissarsiaajunnartut soraarnerussutisiatigullu isertitaajunnaartut allat ilanngaatigineqartarput – ukiumili ilaasortaajunnaarnersiuteqarfiusumi siullermi taakku ilaat 170.000 kr.-init amerlanerusut taamaallaat. Nunatsinni ilaasortaajunnaarnersiuteqarsinnaatitaaneq assiginagu, ilaasortaajunnaarnersiuteqarsinnaatitaaneq aamma ilaasortanuinnaq napparsimaneq pissutigalugu qinersinermulluunniit atatillugu ilaasortaajunnaartunut atuuppoq.

 

Inatsisartut ilaasortaajunnaarnersiuteqartitsinermik aaqqissuussinerat pillugu kikkut tamarmik isumaqarsinnaatitaappit isummaminnillu ersersitsisinnaatitaallutik, aaqqissuussinerup allanngortinneqarnissaa peerluinnarneqarnissaaluunniit siunnersuutigalugu. Ilaasortaajunnaarsimasunilli ilaasortaajunnaarnersiutilinnik inukkutiginninneq inissaqarsorinngilara. Oqallinneq aamma pitsaanerpaajusarpoq isummat assigiinngisitaarsinnaaneri pissutsillu qanoq ataqatigiinnerat ersersinneqarsinnaagaangata. Tamannalu aamma matumani ersersinniarsimavara. ”Nutaarsiassaq” ukiunik 40-ngajannik pisoqaassusilik allaat pitsaasumik torersumillu oqallisigineqarsinnaasariaqarpoq.

 

 

Ikinngutinnersumik inuulluaqqusillunga

Kim Kielsen

Inatsisartut Siulittaasuat