Ukiakkut Ataatsimiinneq 2026

 

2026-mi Inatsisartut ukiakkut ataatsimiinnissaannut (UKA26-mut) oqaluuserisassat ullumi nassiussuunneqarput.

 

Aallarniutigalugu malugeqquneqassaaq ukiakkut ataatsimiinneq piffissanut marlunnut avinneqarsimammat, tassa UKA26 Imm. I-imut aamma UKA26 Imm. II-mut.

 

Inatsisartut ukiakkut ataatsimiinnerat tallimanngornermi ulloq 18. september 2026 nal. 11.30 aallartissaaq 19. november 2026-llu tungaanut ingerlasussatut pilersaarutigineqarluni, tamatumalu kingorna UKA26 Imm. II ulloq 29. januar 2027-mit ingerlanneqassalluni.

 

Apeqquteqaat aallaavigalugu oqallinnissanik siunnersuuteqarnissamut killissarititap ulloq 4. september 2026-p kingorna ullut ataatsimiiffiusussat siulittaasoqarfiup naleqqussartussaassavai, taamaattumillu aamma tamatuma malitsigisaanik ulluni ataatsimiiffiusussani ataasiakkaani immikkoortut oqaluuserineqartussat naleqqussarneqartarsinnaallutik.

 

Immikkoortut katillugit 108-t UKA2026-mi suliarineqassapput. Inatsisartunut ilaasortanit immikkoortut nutaat katillugit 52-it Naalakkersuisunillu immikkoortut nutaat 16-it UKA26-mi suliarineqartussatut oqaluuserisassanut ilanngunneqarsimapput. Tamatuma saniatigut immikkoortut 36-t UPA2026-mit kinguartinneqartut Inatsisartut ataatsimiinnerata aallartinnerani suliarineqassapput.

 

Ullut ataatsimiiffiusussat imatut agguataarneqarput:

 

Ukiakkut Ataatsimiinneq 2026 Imm. I aamma Ukiakkut Ataatsimiinneq Imm. II (UKA26 Imm. I aamma UKA26 Imm. II)

 

UKA26 Imm. I-imi aammalu Imm. II-mi ullut ataatsimiiffiusussat, UKA25-mi 31-usimasut, katillugit 35-ussapput, ullullu ataatsimiiffiusussat sapaatip akunneranut ullunut ataatsimiiffiusunut pingasunut agguataarneqassallutik. Qulliunerusumik pilersaarut imatut isikkoqarpoq:

• Ullut ataatsimiiffiusut nal. 11.00 aallartittassapput 16.00-illu tungaanut ingerlasassallutik, ulloqeqqanut unikkallartoqarani
• Sapaatip akunneranut ullut ataatsimiiffiusut pingasuusassapput nal. 11.00-imiit 16.00 tungaanut
• Oqaluuserisassat ingerlaavartuussapput – taamaalillunilu oqaluuserisassani immikkoortut ullormi ataatsimiiffiusumi naammassineqanngitsut ullormut ataatsimiiffiusussamut tullermut ullormulluunniit immikkut ataatsimiiffiusussamut ingerlateqqinneqartassallutik
• Inatsisartut ataatsimiinneranni matumani akunnerit apeqquteqarfiit ingerlanneqassanngitsut siulittaasoqarfiup aalajangerpaa.

 

Ulloq ataatsimiinnerup ammarneqarfia ilanngullugu UKA2026 Imm. I-imi ullut ataatsimiiffiusussat 28-ussapput. Ulluni ataatsimiiffiusussani 28-ni immikkoortut UPA2026-mit kinguartinneqartut Inatsisartut ataatsimiinneranni sapaatip akunnerinut siullernut agguataarneqarput, taamaalillunilu immikkoortut nutaat Imm. I-ip sinneranut agguataarneqarlutik. UKA2026 Imm. II-p ingerlanneqarnerani aappassaaneerinerit pingajussaaneerinerillu kiisalu apeqquteqaat aallaavigalugu oqallinnerit ingerlanneqassapput.

 

UKA2026-mut tunngatillugu atortussat tamarmik www.ina.gl-imi takuneqarsinnaapput, oqaluuserisassanilu allannguutit nittartakkakkut pisartagarilerneqarsinnaallutik.

 

Inatsisartunut ilaasortat Naalakkersuisullu ataatsimiinnissaq sapaatip akunneranik ataatsimik sioqqullugu iluarsiissuteqarnissamik siulittaasoqarfimmut qinnuteqarnissamut periarfissaqarput, taamaattumillu oqaluuserisassani allanngortitsisoqartarsinnaalluni. Iluarsiissutit tamarmik nittartakkami ingerlaavartumik iluarsineqartassapput.

 

 

 

Inussiarnersumik inuulluaqqusillunga

Mimi Karlsen
1. Siulittaasup tullia