Nersornaat pillugu

 

Namminersornerulernerup ukiunik qulinngortorsiorneqarneranut atatillugu Kalaallit Nunaat namminerisaminik nersornaasiuttagaqalerpoq Nersornaammik, nunani allani nersorinninniarluni saqqarmiuliunneqartartunut nalunngisatsinnut ass. danskit ridderkorsiannut Islandiumiulluunniit falkeordeniannut sanilliunneqarsinnaasumik. Savalimmiormiut taamaaqataanik nersornaasiuttagaqanngillat.

 

Nersornaat tunniunneqartarpoq inunnut immikkut nersortariaqarluinnartumik Kalaallit Nunaannik sullissisimasunut, inuiaqatigiinnik sullissineruppat, inuussutissarsiornermut, eqqumiitsuliornermut, ilisimatuussutsimut imaluunniit allamut tunngasuuppat apeqqutaatinnagu.

 

Nersornaat sølviusutut kuultiusutulluunniit tunniunneqartarpoq. Nersornaat kuultiusoq Namminersorlutik Oqartussat pigisaraat, saqqarmiullillu toqunerani piginnittumut utertinneqartussaalluni. Akerlianik Nersornaat sølviusoq saqqarmiulerneqartup nammineq pigisassaraa utertinneqartussaananilu.

 

Nersornaat Inatsisartut siulittaasoqarfiannit tunniunneqartarpoq. Siulittaasoqarfik aallaavittut ukiut tamaasa kuultiusumik ataatsimik sølviusunillu tallimanik nersornaasiisinnaavoq.

 

Kikkulluunniit nersornaaserneqartussanut inassuteqarsinnaapput. Siulittaasoqarfilli inassuteqaatinut taamaattunut pituttorsimanngilaq, taamalu aamma inassuteqartoqanngikkaluartoq nersornaasiisinnaalluni.

 

1989-imiit nersornaasiisarnerup aallartinneraniit kuultiusunik 57-inik sølviusunillu 359-inik nersornaasiisoqarsimavoq.

 

Naalakkersuisut siulittaasuisa Inatsisartullu siulittaasuisa – nunatsinni atuuffiit qaffasinnerpaat marluk – kuultiusumik nersornaaserneqartarnerat ileqquuvoq.

 

Taakku saniatigut kuultiusumik nersornaaserneqarsimasut ilaatigut tassaapput kunngikkormiut (Dronning Margrethe, Prins Henrik, Kong Frederik aamma Dronning Mary) nunallu allat qullersaat ataasiakkaat (Islandip præsidenterisimasaa Ólafur Ragnar Grímsson), nunani allani kunngikkormiut nunallu allat aallartitaat, ambassadørit. Kuultiusumik nersornaaserneqarsimasunut ilaapputtaaq Danmarkimi ministeriusimasut Kalaallit Nunaannik immikkut sullissisimasut.

 

Eqqumiitsuliortut, atuakkiortut kulturilerisullu allat ataasiakkaat taamatuttaaq kuultiusumik nersornaaserneqartarsimapput, ass. Thue Christiansen, erfalasutsinnik ilusilersuisoq aamma tusagassiortoq atuakkiortorlu Jørgen Fleischer. Tamanna aamma ilagiit sinniisaannut arlalinnut, ilaatigut Sofie Petersenimut, Kalaallit Nunaata ukiuni 25-ni biskopperisimasaanut, atuuppoq.

 

Taaneqartut saniatigut nunatsinni inuussutissarsiortut, aalisarnermik inuussutissarsiuteqartut ilanngullugit, sinniisaat taaneqarsinnaapput.

 

Allalli allanit pingaarnerusutut isigalugit immikkut taaneqassanngillat – tamarmik assigiinngitsutigut nunarput pillugu sinnerlugulu nersortarialimmik immikkorluinnarlu ittumik suliniuteqarsimapput. Tamanna kuultiusumik Nersornaaserneqarsimasunut taamatullu aamma sølviusumik Nersornaaserneqarsimasunut tamanut atuuppoq.

 

Innuttaasut nammineq inuunertik ulorianartorsiortillugu sapiitsuliorlutik allat inuunerinik annaassisimasut Nersornaasiisarnerup siunertaasa avataanniipput. Akerlianik Kalaallit Nunaanni Politiit innuttaasunik inuit allat inuuneri annaanniarlugit politiilluunniit ikiorlugit immikkorluinnaq nersortarialimmik iliuuseqarsimasunik ataqqinaasiisarput.