Kangerlunni qalorsuarsorluni aalisarnerup ineriartornerata Aalisarnermut, Piniarnermut Nunalerinermullu Ataatsimiititaliamit oqaluuserineqarpoq

Kangerlunni qalorsuarsorluni aalisarnerup ineriartornera ataatsimiititaliap kingullermik ataatsimiinnermini oqaluuseraa, tamatumani saarullinniarneq immikkut aallullugu. Qulequtaq aalisarnermik inuussutissarsiuteqarnermut nunatsinnilu immami uumassusillit aqunneqarnerannut pingaarutilerujussuuvoq, taamaattumillu ataatsimiititaliap ineriartorneq qanimut malinnaaviginiarlugu aalajangerpoq.

Aalisarnerup siunissami suliamik ilisimasaqarneq piujuartitsinerlu tunngavigalugit malittarisassiuunneqarnissaa ataatsimiititaliamit pingaartinneqarpoq. Piujuartitsinissamik tunngaveqarneq aalisakkanik pisuussutinik aqutsinermi suli aalajangiisuusumik tunngavigineqartariaqarpoq, taamaalilluni maanna siunissamilu kinguaariinnut iluaqutaasussamik aalisagaqatigiit akisussaassuseqartumik atorluarneqarnissaat qulakkeerneqarsinnaaqqullugu. Tamatuma peqatigisaanik pinngortitamik mianerinninnissap aammalu sinerissap qanittuani aalisarnermut atatillugu inuussutissarsiutitigut soqutigisat akornanni pitsaasumik oqimaaqatigiissitsiuarnissaq pingaaruteqarpoq.

Taamaattumik Naalakkersuisut suliassaqarfimmi suliamik ingerlatitseqqinnissaat kiisalu ineriartortitseqqinnissaq ataatsimiititaliamit qanimut malinnaavigineqassapput. Apeqqutip oqaluusereqqinneqarnissaa ataatsimiititaliamit qilanaarineqarpoq aammalu suliaq pillugu naliliinerit  naalakkersuinikkullu iliuusissat kangerlunni aalisarnermik siunissami aqutsinissamut pingaaruteqarsinnaasut pillugit ingerlaavartumik paasiniaasassalluni.

Ataatsimiititaliaq sinnerlugu

Bentiaraq Ottosen

Aalisarnermut, Piniarnermut Nunalerinermullu Ataatsimiititaliaq

Paasisaqarnerorusukkuit ataatsimiititaliap siulittaasua mobilikkut attavigisinnaavat +299 258696