Sermitsiap nittartagaani ulloq 18. marts allaaserisamut ”Siunnersuutigut Inatsisartut itigartitsissutigaat”-mik qulequtalinnut akissut

Sermitsiap nittartagaani allaaserisaq ”Siunnersuutigut Inatsisartut itigartitsissutigaat”-mik qulequtaqartoq Inatsisartullu siulittaasuattut oqaaseqarfigisariaqagara atuarneqarsinnaavoq.

 

Aallaqaasiutigalugu Naleqqap siulittaasuata allaaserisami eqqortumik issuarneqarsimanissaa naatsorsuutigivara.

 

Pissutsit ullumikkut imaapput Inatsisartut siulittaasoqarfiat tassaalluni ataatsimiinnissamut oqaluuserisassatut siunnersuutit tunniussinissamut piffissarititaasoq eqqorlugu tiguneqarsimasut tunngavigalugit ataatsimiinnissamut oqaluuserisassanik suliarinnillunilu aalajangiisartoq. Siulittaasoqarfiup sulinera taamaalilluni partiilersorfiunngilaq siulittaasoqarfiummi Inatsisartunut ilaasortat tamaasa sullittussaammagit, soorlu aamma Naleraq siulittaasoqarfimmut sinniisuutitaqartoq siulittaasoqarfimmut ilaasortat allat assigalugit partiilersorani aamma sulisumik.

 

Siulittaasoqarfiup taamaalilluni Naalakkersuisunit ilaasortanillu siunnersuutinik tunniussinissamut killissarititaq qaangiukkaangat atortussat tiguneqartut taakkulu suleriaatsimi peqqussutaasutut ulloq 1. marts nal. 12.00 tunniussinissamut killissarititaasoq eqqorlugu tunniunneqarsimanersut nalilersortarpai. Taamatuttaaq suleriaatsimi aalajangersarneqarsimavoq siunnersuutit nal. 12.00 kingorna tiguneqarsimappata taakku ullup suliffiusup nalinginnaasup tulliani, matumani ataasinngornermi ulloq 4. marts nal. 12.00, tiguneqarsimasutut nalunaarsorneqassasut.

 

Tamatuma saniatigut siunnersuutit tiguneqarsimasut tamaasa siulittaasoqarfiup misissuataartarpai, tassunga ilanngullugu ilusissanut piumasaqaatinik tamanut atuuttunik naammassinnissimanersut.

 

Ilaasortat taamaalillutik ataatsimiinnissaq sioqqulluarlugu piffissaqarluartarput siunnersuutimik nassiunnissaannut paasissutissiissutigalugu siunnersuummik inaarutaasumik, tassa siunnersuutit amerlanerit pisarnerattut teknikikkut misissuataagassaanngitsumik, nassiussaqarnerlutik. Siunnersuutit nassiunneqartut eqqortuunissaat, taamatullu aamma ilusissanut piumasaqaatinik naammassinnissimanissaat piffissamillu tunniussivissamik eqquutsitsinissaat, ilaasortat namminneq akisussaaffigivaat.

 

Siunnersuutit eqqortumik tiguneqarsimasut tamarmik ilusissanut piumasaqaatinik naammassinnissimanissaat inaarutaasumillu siunnersuutaanerat erseqqissumik paasissutissiissutigalugu nassiunneqarsimanissaat piffissaliussarlu eqqortillugu nal. 12.00 tunniunneqareersimanissaat siulittaasoqarfiup qularnaarsimasariaqarpaa.

 

Siulittaasoqarfiup taamaalilluni siunnersuutit tamaasa assigiimmik suliarisarpai ilaasortanik partiinilluunniit assigiinngisitsinani. Ilaasortat taamaalillutik aamma allaffigineqartarput siunnersuutit oqaluuserisassanut ilanngunneqarnissaminnut ilusissanut piumasaqaatinik naammassinnissimanngitsut itigartinneqarsimanerinut tunngavilersuutitalimmik, tamatumunngalu ilanngullugu ilaasortat qinnuigineqartarlutik itigartitsineq tamatumunnga pissutissaqalersitsippat siulittaasoqarfimmut naammagittaalliuuteqarlutilluunniit oqaaseqaateqaqqullugit. Taamaalilluni aamma nutaarsiassaanngilaq ilaasortat Inatsisartut ataatsimiinnerinut assigiinngitsunut siunnersuutimik oqaluuserisassanut ilanngunneqarsinnaannginnerinik misigisaqartarmata, taamaattoqartilluguli ilaasortat periarfissaqartuartarlutik ataatsimiinnissamut aggersumut siunnersuutip saqqummiunneqaqqinnissaanut ilusissanut piumasaqaatit naammassineqarsimanissaat qularnaassallugu. Tamanna Naleqqamut aamma suli periarfissaavoq.

 

Taamaattumik allaaserisami aalajangersimasumi tassani suliassap allaaserineqarnera ilisarisinnaanngilara, soorlu aamma siulittaasoqarfik Naleqqap ilaasortaatitaanit naammagittaalliuutinik oqaaseqaatinilluunniit, ingerlaavartumik tunniussisarsimanernut Naleqqap innersuussutigisaanut ”aalajangersimasunut” innersuussutitalinnilluunniit,  tigusaqarsimanngitsoq. Taamaattumik suliassat ataasiakkaat eqqarsaatigalugit tusagassiorfitsigut oqallinnermut peqataanissaq siulittaasoqarfimmut ajornakusoorpoq.

 

 

 

 

Mimi Karlsen

Inatsisartut Siulittaasuat